27
1 Yoube da amane sia:i,
2 Na da Esalebe Gode Bagadedafa amo Ea Dioba:le amane ilegele sia:sa. (be E
da nama molole hame fofada:sa amola na se nabima:ne hamosa.)
3 - 4 ‘Gode da nama mifo gebewane ianea, na lafi da wadela:i sia: hame sia:mu,
amola na gona:su da ogogole hame sia:mu.
5 Dilia da moloidafa sia:i, amo na da hamedafa sia:mu.
Amola na da wadela:le hame hamoi sia:neawane, na bogomu eso da doaga:mu.
6 Na hou da moloidafa.
Amo dawa:su na da hamedafa yolesimu.
Na asigi dawa:su da fofada:i dagoi.
7 Dunu huluane amo da nama diwaneya udidisa, amola nama gegesa.
Ilia da moloi hame dunu amola wadela:i hamosu dunu
ilia se dabe iasu defele lamu da defea.
8 Gode Ea hou hame lalegagui dunu da Ema fofada:musa: doaga:sea,
ilia da hahawane dafawane hamoma:beyale dawa:su hamedafa ba:mu.
9 Bidi hamosu da ilima doaga:sea, Gode da ilia dini iabe nabima:bela:? Hame mabu!
10 Ilia da hahawane hou, Gode da ilima imunusa: dawa:i, amo hanamu da defea galu.
Ilia da Ema mae fisili sia:ne gadolalumu da defea galu.
11 Na da dilima Gode Ea gasa bagade hou
amola Gode Bagadedafa Ea ilegesu amo dilima olelema:ne,
dilia logo doasima.
12 Be hame! Dilisu da amo hou huluane ba:i dagoise!
Amaiba:le, dilia abuliba:le amo hamedei udigili sia: dabela:?”
Soufa da amane sia:i,
13 “Gode Bagadedafa da wadela:i nimi bagade dunuma amane se dabe iaha.
14 Ilia dunu mano bagohame lalelegesa.
Be huluane gegesu ganodini medole legei ba:mu.
Ilia mano da ha:i manu defele hamedafa ba:mu.
15 Mogili hame bogoi esala, ilia da olo madelale bogogia:mu.
Amola ilia didalo da ili bogobe amoga hame didigia:mu.
16 Amabela:? Wadela:i hou hamosu dunu
da silifa fage idimu hamedei gagumu.
Amola abula liligi ilia lamusa: hanai baligili gagumu.
17 Be molole hamosu dunu da ilia abula lale ga:sisimu.
Amola noga:idafa dunu da ilia silifa fage ladimu.
18 Wadela:i hamosu dunu ilia da ogome diasu agoai
o udigili hawa: hamosu dunu da sagai sosodo aligisa,
amo ea diasu agoai gagusa.
19 Ilia da bagade gaguiwane dialumu.
Be eso afaega ilia da nedigili wa:legadosea,
ilia bagade gagui liligi da asi dagoi ba:mu.
20 Hano hedolo fili gala:be defele, beda:su hou da ili famu.
Gasia fo da misini, ili mini asi hame ba:mu.
21 Gusudili fo da ilia diasudili ili huluane fadegale, ili mini asi ba:mu.
22 Ilia da hobeamu logo hogoi helele hame ba:mu.
Be amo fo da ilima mae asigili, ili fulabole fasili, hamedafa ba:mu.
23 Ilia da hobeale ahoasea, gusudili mabe fo da ilima gulaligisa.
Fo da gugunufinisimusa: gasa bagadeba:le, ilia da bagadedafa beda:sa.