Varuai Na Letasi Nigna
Jon
Na Titiono Eigna Na Letasi Iaani
A Jon, na mane vaovarongo nigna a Jisas, ke risoa na letasi iaani. Imanea ke risoa vania, “na vaivine a God ke vahigho ma ara dathemu,” kari sethe na tinoni kena toatogha imanea ke risoa vanira na komi tinoni kiloau tagna sina meleha. Na vunegna kekeha tinoni kena vaparara na komi tinoni kiloau, da imanea ke bosi magnahaghinia keda tateli aua arahai ke rioriso vanira.
Jon ke risoa na letasi iaani bali vaheta na ghaghanadia na komi tinoni kiloau eigna kedana veidothovighi. Me magnahaghinia mua na veleragna eigna kedana saghoi hathera arahai kena titionoa na velepuhi piapilau.
Na komi fata ke nagho kori buka iaani:
Na pukuni dotho (1:1-6)
Mara na velepuhi piapilau (1:7-13)
1
1 Inau, na mane ku baubatu kori kiloau, ku risoa atua na letasi iaani itamua ighoe, na vaivine a God ke vahigho ma ara dathemu.*Sethe na tinoni kena toatogha a Jon ke risoa na letasi iaani vania na komi tinoni kiloau tagna sina meleha, kari e kilora “na vaivine a God ke vahigho ma ara dathemu.” Inau ku pukuni dothovighamu puala. Boi inau vamua, keana arahai mua kena adoa na komi fata ke tutuni a God ke tateli aua. 2 Ighami kiti dothovighamu eigna ighita gougovu kati adoa na komi fata ke tutuni mati adora hahalia.
3 Inau ku tarai kaea a God a Tamada ma a Jisas Krais, a Dathegna eigna koroda vatokeghita, moro dothovighita, moro hatheghita eigna katida mono haidu kori soleana. Inau ku tarai agai eigna ighita kati vaututunia na velepuhi ke tutuni mati veidothovighi.
Na Pukuni Dotho
4 Inau ku totogo nigua puala eigna ku rongovia kekeha ara dathemu kena pukuni leghua na velepuhi ke tutuni vaghagna a Tamada ke veleghita. 5 Mi ikeagaieni, inau ku kaeghamu eigna katida veidothovighi. Iaani boi na vetula mathangani, keana na vetula kati adoa kori vido kati turughu na leghuagna a Jisas Krais. 6 Na pukuni dotho hiri, na leghuagna na komi fata ke veleghita a God. I hau, kori vido ighamu koti turughu leghua a Krais, a God ke veleghita ghohi gi ighita katida veidothovighi.
Mara Na Velepuhi Piapilau
7 Sethe mara na velepuhi piapilau kena taveti au kori maramagna. Imarea kena boi vaututunia a Jisas ke havi mai kori maramagna kori pukuni tono i tinoni. Na komi tinoni irangeni, imarea kena piapilau mena thevuioka tagna a Krais. 8 Moti reireghi toke ghamu itadia mara na velepuhi piapilau irangeni. Gi kedana pilaunighamu, nimiu na agutu koti eia vania a God e teo sa vunegna. Keana gi kotida talu sokara ngasi, a God keda heghamu na komi fata ke toke ke taluhaghorea vanighamu.
9 Inau ku veleghamu, ahai keda talu haidua nigna na toatogha ghehegna tagna na velepuhi nigna a Krais me boi leghua hahalia nigna na velepuhi vamua, imanea ke boi sikei duagna a God. Keana, ahai ke talu vaututunia na velepuhi nigna a Krais, imanea ke mono duagna na Mama ma na Dathe. 10 Gi ahai keda mai itamiu me titiono vanighamu na fata ke tavogha tagna na hava ke velea a Krais, oti saghoi kilo haghea kori vathemiu ba haghore soleana itagna. 11 Gi ahai keda haghore soleana itagna, imanea ke thevu itagna me hathea tagna na komi fata ke dika ke eia.
Na Vagovui Haghore
12 Sethe na komi fata ku haga veleghamu atu, keana u boi haga riso horua tagna na letasi iaani eigna kenughua da u atu reghighamu mua. Kori vido kuda atu itamiu, ighita tangomana katida sakai uurungu. Iangeni keda vatotogoghita puala.
13 Ara dathegna a vaivinemu†“ara dathegna a vaivinemu,” Da a Jon ke toghara na komi tinoni kiloau tagna sina meleha tavogha. a God ke vahira kena mono eeni, imarea kena vetula atua itamiu nidia na haghore dotho.