8
Eutumai jiwae Yesu kondade edo esitera.
Ango edo ainda amboda, Yesu maundo nasi babainde babaingaede da da torido idegedo eite dengoro baiari pipiteite God da gisijiarida bino dave karigeteite pepeta esisina, ae ainda embobo 12* ainda embobo 12. Guriki ge einda awa ajigari 12 akuta. Awarata ainda moka awa Yesu da ambodani 12 o Yesu da piari aimbari embobo 12. Luke 6:13 daedo giwo. ainde daedo. Edo eutumai nenei ae Yesu de daedo maunsitera. Iji gisi awa ami awamane da da asisi bebegaemi bundari awa ge tesiri udegari buritera, edo nenei karu neindekainde gao esiri kaviyegesitera. Eutu nei awa Mary, nasi Magadala da eutu. Awa Yesu mi binei 7 ainda doda itari awa ondesiri idegesitera. Edo eutu nei awa Joanna, Chuza da aro. Ainda iu awa Daotari Herod Daotari Herod da daobé awa Herod Antipas. da oromandoda gisijiari. Edo eutu nei awa Susanna. Eiwamane ae eutumai nenei jiwaedemi Yesu ae ainda embobode, awamaneda gaiapami kondade edo esitera.
Yesu eniya ge butu gavida budo ami atopaposisina.
(Matthew 13:1-23; Mark 4:1-20)
Ango edo embomai jisi bajina doregesitera. Edo iji ainde awamane nasi evekara jiwae da da ami Yesu da yai gumbero, ami eniya ge eiwa awamanede sisina: “Embo da (1) mi ainda rorae vero purara piain kundo maunsisina. Edo purara pipiteiri vero nenei begata beda duduritera. Awa embomi gundo maundo eite taimi patero beyae esiri nimi wotedo injitera. Edo nenei banga tamonda duduritera. Edo yai ainda butu tatapu itae, awatedo, erido mumuya esitera. Vero nenei kurere teoroda duduritera, edo kurerede daedo erido ami ipuda engetero ginene esitera. Edo vero nenei butu daveda duduritera. Awa erido be jiwaebé, 100 ango, esitera.”
Yesu eniya ge awa tedo, amboda ge ikanade tedo sisina, “Ingiwo! Imomane ge ro tena awa bé gain edo gawa!”
Ainda amboda, ambodanimi ainde tedogositera, “Eniya ge teteta ainda mokabé rori?”
10 Ango tetero Yesu mi sisina, “Imomane God da gisijiarida gebé onjigari awa ano arapa ari gawa. Ata nanemi owamaneda yai eniya gemi akuta tana. Awatedo,
‘Nato buro gara, ata ainda mokabé mana gara;
Nato ge ingara, ata ainda atopatari mana arapa ari gara.’ Isaiah 6:9
11 “Awara, eniya geda mokabé awa evire: Vero awa God da ge ango. 12 Edo vero begata beda duduritera awa engo embomai ge awa ingido doda pisido era. Ata awamaneda gebé ari God da yai piaro ami awamane toregeurekae, Binei gupeite ge awamaneda doda awa beono edo kundo maundo eira. 13 Edo vero banga tamonda duduritera awa engo embomai ge awa ingido do yawade budo era. Ata ge awamaneda doda besinya piae, awamane iji tupo God gebé edo era. Ata iji angode bawari gumburi awamaneda gebé ari dodo taigedo era. 14 Edo vero kurere teoroda duduritera awa engo embomai ge awa ingido ainto eiworo kotembari jiwaemi do buriya ari, gaiapade ain, edo tamopisida jipapa ain arimi pasiuri awamane be dave ekae edo era. 15 Ata vero butu daveda piesiri duduritera awa engo embomai ge awa ingido do davebé davede ge awa jido takimbedo era, awa tataimbarimi be dave ekedo era.
Yesu eniya ge keimo parara piarida budo ami atopaposisina.
(Mark 4:21-25)
16 “Edo daedo embo aimi keimo ijimbedo ou kuwoda piari tao ae o awari tenemba dutuda piari tao ae. Ata ainda petari yaida pieuri ami parara pisido eira, edo embo gundo mandoda totoreite parara awa gorote. 17 Aindabé, rorae ro onjigarida itari awa kundo arapada piaina. Edo rorae ro apuregari itari awa pirigari arapa aina. 18 Awatedo, ge nato ro ingevi awa jidogogo ewo! Aindabé, embo aimi ge awa do davebé davede jido takimaina awa God mi kondade edo gari teka piaina. Ata embo aimi ‘Ge awa bainyae. Na matu gari!’ ango kotembeteira, awa saka ro ainda yai isira awa dodo baina.”
Ainkaimi God da ge kera edo era awa Yesu da ai ae nanonameji de.
(Matthew 12:46-50; Mark 3:31-35)
19 Iji angode, Yesu da ai ae nanonameji de embo awa gaintedo guputera. Ata embo jisi da itera, awatedo, torido tambari tao ae. 20 Ango etero gido embo neneimi ainde sitera, “Ito ai ae nanonameji de awa arapada petetera isite imo gain jipapa era.”
21 Ata ango tetero Yesu mi mina sisina, “Nato ai ae nanonameji de awa eiwamane ainkaimi God da ge ingido kera edo era.”
Yesu ge okain bisi ae kakawa de tesiri ainda ge kera edo​ ​damodamo esitera.
(Matthew 8:23-27; Mark 4:35-41)
22 Ango edo deguta da (1)de Yesu ae ainda ambodani de un ma doda visido ami awamanede sisina, “Puwo! Kaende ubutu kupo neinda tembore. Ango tesiri awamane ma gaigedo tembari tuturo esitera. 23 Ata iji ainde awamane tepero embo awa durudo jitao ausina. Edo burigibé bisibubura bajina wotedo ubutu desiri ma utoro vivisiri awamane bouga bajinabé buritera.
24 Edo awamane gundo imo audedo sitera, “Badarari, Badarari, kaen betain era!”
Ango tetero Yesu erido petedo ge okain bisi ae kakawa de tesiri, awamaneda wasiri dandedo damodamo etero ubutu binono dorisina. 25 Ata ami awamanede sisina, “Itomane gebé ari embo anda yai pipitevi?”
Edo awamane adu edo korebé edo akuta ge mina tara esitera, “Embo eiwa averi? Ine ge okain bisi ae kakawa de siri ainda ge kera era!”
Yesu embo bineimi bundari awa gao esisina.
(Matthew 8:28-34; Mark 5:1-20)
26 Ainda amboda awamane temundo yai Gadareni ainda maunsitera Galili ubutu kupo neinda. 27 Iji angode Yesu ma dodo tai butuda piesiri, embo da (1) nasi bajinada edo gupusina ami Yesu tapusina. Iji riboribé embo ainda doda binei isima edo esitera. Edo embo awa gongosini itae, ko ainda mandoda itae, ata goiari yaida isima edo esisina. 28-29 Iji ainde embo awa Yesu gido aorogatedo ainda taida dudurisina. Edo Yesu mi asisi beyae ainda doda awa idegarate tesiri ami aoro ikanade gatedo sisina, “Yesu, God Ikane bé Ikaneda Mai, imo namonde ro ain jipapa esi? Imo benunu tena, na dedo sitote!” (Iji jiwae bineimi embo awa dedo dumundo esisina. Awatedo, embobomi asi okain aurimi ari asi okain aurimi ari da moka English geda awa chain(s). ami ainda ipatai bundedo sima edo esitera. Ata embo awa asi okain aurimi ari jiuri kapeuri bineimi gisijido abu taoteda kundo maundo esisina.)
30 Edo Yesu mi tedogosisina, “Dao ito averi?”
Edo ami mina sisina, “Jisi Da”, aindabé, binei jiwaebé embo ainda doda torari itera, awatedo. 31 Ango edo bineimi Yesu de benunu tedo dowae esitera, ami ge okain tari awamane God da rirowa bari yai ugonuda mamborekae.
32 Edo iji dá ainde pumane jisi da peji tembada rorae indeite isiretera. Awatedo, bineimi Yesu de benunu tedo dowae esitera, “Nakare awara ato maundo pumaneda doda torore.” Edo ami awara sisina. 33 Ango tesiri binei emboda doda awa dodo idedegedo maundo pumaneda doda totoritera. Edo pumane jisi da adujinanga edo tumundo maundo dedewada wotedo un ubutuda dadagumbedo un injido bebetegesitera.
34 Iji angode pu sima ari embobomi wasiri ro idegesira awa gido adu tumundo maunsitera. Edo bino awa nasi bajinada edo indari kumbari urari nasida karigetero gositera. 35 Ango etero embomai idegedo wasiri nongo esiri teri awa jisimi gain maunsitera. Edo awamane Yesu da yai gundo embo binei matu dodo idegetera awa taputera. Embo awa ombarijiari ari Yesu da taida anumbedo kotembari dave bureite isiri gido adu esitera. 36 Edo embobo avekave wasiri awa gositera ami daedo Yesu mi nongo esiri embo bineimi bundari awa kaviyegesiri awa embo teteka gumbera awamanede tetero gositera. 37 Ango edo embomai berari yai Gadareni doda adu ari bajinabé buritera. Awatedo, awamanemi Yesu yai neinda mambarate sitera.
Ango tetero gido imo ma doda visido overegedo mamain esisina. 38 Edo embo binei doda idegesitera, ami Yesu de benunu tedo dowae esisina, “Imonde daedo mamanita?”
Ata Yesu mi embo awa pipiteite sisina, 39 “Dodo egenembedo orobe itoda mambuyo! Edo awamane teyo goré, God mi wasiri babain ro imo embo esira awa!” Edo embo awa dodo maundo nasi bajinada doda embomai berari ainda itera awamanede Yesu mi wasiri babain ro imo embo esiri awa karigesimene maunsisina.
Yesu mi gagara betari tesiri erorisina edo eutu karude gao esisina.
(Matthew 9:18-26; Mark 5:21-43)
40 Awatedo, iji angode Yesu overegedo tembiri embo jisi da berari imo gain sima ero jijirisina, ami dubodavede oro site buritera. 41-42 Ango ero embo da (1) gupusina, ainda dao awa Jairus. Awa Judah embomainda benunu oroda badarari. Aindabé, ainda gagara dakaima, duberi 12 ango, awa betain eiri, ami gundo Yesu da taida durudo ainda mandoda gumbarate benunu tedo dowae esisina.
Ango edo Yesu ainto eiri embomai jisijisimi doiedo daedo maunsitera. 43 Edo eutu da (1) awa karu ororo bureite duberi 12 doturisina. Ami iji matawa siwo gao ari emboda yai, aro kaviyegain ganu kundo gundo maundo esisina. Ata karu kaviyegae, ainda ganu itae pipisisina. 44 Eutu awa Yesu da gunda maundo ainda ombari riborida begisi tujijisina. Ango esiri boraebé ainda ororo jingesisina.
45 Edo Yesu mi sisina, “Aimi na tujiri?”
Awamane berarimi, “Na gae gi!” sitera.
Edo Peter ae embobo neneindemi sitera, “Badarari, embomai jisijisi tapitapi era ami imo papotera. Ango ero imo ‘Aimi na tujiri?’ teta!”
46 Ata Yesu mi sisina, “Nato goroba idegeteiri mina bena, awatedo, embo da (1)mi na tujira.”
47 Ango tesiri eutu awa onjigari tao ae awa gido, do periperi eite gundo ainda doda durudo ainde karigesisina, embomai berarida jisida ro embo imo Yesu tujiri edo nongo edo kaviyegari boraebé biri. 48 Edo Yesu mi eutu ainde sisina, “Gagara nato, adu eote ta goroba buyo! Gebé ari itomi eteno kaviyegeteta. Awara, bégade mambuyo!”
49 Edo imo matawa ge site isiri embo da (1) awa badarari Jairus da mandoda edo gundo ainde sisina, “Ito gagara itae esira. Awatedo, Atopatari dowato mando itoda gumbure.”
50 Ata Yesu ge awa ingido Jairus de sisina, “Adu eote! Tepo da (1), na gebé eyo! Gagara ito kaviyegare.”
51 Ango edo Yesu Jairus da mandoda gundo embo nenei tororekae sisina. Ata Peter ae John de James de edo gagarada aimamo de akuta kundo totorisina. 52 Edo embomai berari gagara awa embo jinda buira eite ji sitera. Ango ero Yesu mi sisina, “Ji teove! Gagara awa betae, ata tepo jitao aveira.”
53 Edo awamanemi gagara matu betesira awa gositera, awatedo, Yesu tedojijiritera. 54 Ata embo ami tesiri awamane berari arapada idegetero gagara ainda ipada jido sisina, “Gagara naka, eriyo!” 55 Edo ainda asisi tekago gumbiri gagara awa burigibé erorisina. Ango esiri Yesu mi sisina, “Gagara eiwa rorae piewo indare!” 56 Edo ainda aimamo bé korebakore esitera, ata awamanede sisina, “Wasiri ro eteno gewa, eiwa embo neneinde teove!”

*8:1 ainda embobo 12. Guriki ge einda awa ajigari 12 akuta. Awarata ainda moka awa Yesu da ambodani 12 o Yesu da piari aimbari embobo 12. Luke 6:13 daedo giwo.

8:3 Daotari Herod da daobé awa Herod Antipas.

8:10 Isaiah 6:9

8:28-29 asi okain aurimi ari da moka English geda awa chain(s).