यूहन्ना की पहली पत्री
युहन्नान पेहली चिट्ठी
1 युहन्नान बारामां
1 युहन्नान चिट्ठी नेवताळा युहन्नान साहरे मसीन पयदा हवणेन पचास सी सोव सालेन ईचमां लिखी गुयली। युहन्नु खुद काजे लिखण्यान रुप मां नी उळखे, बाकुन पेहला पाठ मां देखाड़े की चु ईसुन जीवनेन मरलाम सी पछो जीवतो हवणेन एक गवा बणे। 1:1-3 1 युहन्ना मां लिखणेन तरीकु बी युहन्नान अनसारे खुस-खबर मां जड़ला लिखणेन तरीका सी घणो हीळे-मेळे। असो मानी जाय की युहन्नु ईफीसुस मां रवतु जाय्न युहन्ना ने तीन आक्सर मां 1 युहन्ना, 2 युहन्ना, 3 युहन्नान अनसारे खुस-खबर लिखलो हतलो।
युहन्ना जी चिट्ठी आखा ईसु पर भुरसु करन्या काजे असी टेम मां लिखलो जत्यार मंडळी काजे आत्मान अकलेन नावेन माणसेन एक पंथ सी परेसानी हय रय। ईनु माणसे काजे माननु हतलो की ईसु पुरी तरह सी भगवान हतला बाकुन धरती पर रवता जाय्न चु छाचलीन सीकार ने खुनेन डील वाळा माणसे नी हतला। हेरे मतलब सी युहन्ना ईसुन जीवनेन गवा हवणेन बारामां लिखे ने ज्य की हेरे आपणे हाते काजे ईसु छीमाड़्यु। 1:1-3 ईनी चिट्ठी काजे लिखणे मां युहन्नान उदेस हेरी खुसी काजे पुरो करनु हतलो 1 युहन्ना 1:4 ईसु पर भुरसु करन्या काजे पाप करने सी रुकणु 1 युहन्ना 2:1 ईसु पर भुरसु करन्या काजे झुटा सीकापण सी बचणु 1 युहन्ना 2:26 ने वायदु कराड़नु की ईसु पर भुरसु करन्या चे बची गुयला छे। 5:13
बाहरती वात
1. युहन्ना आपणी चिट्ठीन उळखाण देय ने हीनाक लिखणेन एक उदेस देय। 1:1-4
2. अळतेन चु बताड़े की भगवान कसों उजाळो छे ने हामुक ईसुन तसों जीवणु चाहजे। 1:5—3:10
3. हेरे पछेन चु हामुक एक दीसरा सी परम करे की हुकुमेन हेर देवाड़े। 3:11—5:12
4. चु आपणी चिट्ठी काजे पुरो करे। 5:13-21
1
जीवनेन बुल
1 कळ घड़ायणे सुरु नी हयो, ने पेहलुत सी, बुल नावेन एक जणु हतलु। चु ते भगवान बास साते सरगेम हतलु, ने अळतेन माणसेन अवतार लीन हामरे ईचमां उजेंतु हयु। ने ज्य जीवनेन झर बी छे; हेरेसी हामु तीनाक जीवनेन बुल बी कह्जे। हामु जे तेरा नेवताळा छे, तीनाक ते देख लेदला छे, ने तेरा बुले सामळी लेदला छे, जे बुले आखा काजे अमर जीवन आपे। ईनी अमर जीवनेन वाट ते तेरे साहरे देखाव पड़ी; हामु ते धीयान लागाड़ीन तेरा जीवन काजे पंतार लेदला छे, ने हामरे हाते करीन तीनाक छीमी बी लेदला छे। 2 ने हय हामु तेरीत गवाय देजे, तीनाक हामु डुळे देख्ला छे। ने तेरे साहरे जड़ली जलमेन जीवनेन परचार बी करजे। जु बचाड़न्यु ईसु मसीत छे। 3 हव, हामु ईना ईसुक देखला, ने सामेळला छे, तेरीत खुस-खबर हामु तुहुंक देखाड़जे। हामु ते बासेन, ने तेरा बेटा ईसु मसीन साजल्या रवजे। जी वात हामु एरेन करीन तुहुंक देखाड़जे की तुहुं बी हामरे पुठ्ये रवीन तींद्री साजल्या बण जावु। 4 ने हामु जी वात तेरेमां तुहुंक लिख रया, की तुंद्रे बारामां हामरी खुसी छे, ची खुसी पुरी हय जाय।
भगवान वीजाळो छे
5 ने हामु ईसु मसी सी जी खुस-खबर सामळ्या, ने चीत खबर तुहुंक बी सामळावजे, चो ज्य छे; की भगवान वीजाळो छे, ने तेरेमां काय बी आंदारलो नी हय। 6 कदी आपणे मायन काहनाक कह्वे की हामु ते भगवानेन साजल्या छे, ने असु दावु करीन बी आंदारला सारकी कुहराय, ने पाप मां जीवे, ती चे झुटा छे, ने चे छाचाय पर चालन्या नी हय। 7 बाकुन जसु भगवान बास वीजाळा मां रवे, तसात आपणुक बी वीजाळा मां जीवणु चाहजे मतलब भगवान बासेन तसी चुखली ने खरली जीवाय जीवणु चाहजे। असा आपणु जीवसु, ती एक दीसरान साजल्या बणीन रय सक्सु। काहाकी आपणुक आखा पापेम सी चुखा करीन आपणुक चुखला भगवानेन सात-संगात मां भेसकणे करीन भगवान बासेन पुर्यु ईसु मसीन लुही कामको छे।
8 थुड़ाक माणसे कदी असा कह्वीन सीकाड़े, की आपणे मां पाप करनेन हर लग नी हय, ने कदी आपणु बी तींद्रेन तसात कहणे बाजी जाजे, ती आपणु आपसात काजे धुकु दी र्या, ने आपणे मां छाचाय नी हय✡यसाया 2:5। 9 कदी हामु आपणा-आपणा पाप काजे मान लेजे, ती भगवान बी हामरा पाप काजे माफ करने, ने हामुक आखा भुंडा काम सी चुखा करने मां भुरसा वाळु ने धरमी छे✡भजन सहीता 32:5; नीतीवचन 28:13। 10 थुड़ाक माणसे असा कय्न सीकाड़े, की हामु काय पाप नी कर्या, कदी आपणु बी तींद्रेन तसात कहणे बाजी जाजे, ती आपणु आपसात काजे धुकु दी र्या, ने आपणे मां छाचाय नी हय। ने हेरो बुल आपणा मन मां नी हय।