2
ईसु हामरी मदत करे
1 ए मारा लाटेक्ला पुर्या-पारी, तुहुं पाप घुण करु, हेरेन करीन मे जी आखी वात लिखणे बाजी रयु; बाकुन कांखुर मायन भुल सी कुय पाप कर देय, ती बास अगळ आपणे अगु हय्न आपणुक माफी आपाड़न्यु धरमी ईसु मसी छे। 2 ने हयुत ईसु मसी आपणा पाप काजे माफ कर्यु; ने आपणा पापेन बादा अतरुत नी, बाकुन आखी कळीन माणसेन पाप काजे माफ कर्यु।
3 आपणु, ईसु मसी काजे जाण्या की नी जाण्या, ईनी वातेन पुरावु काय छे? कदी आपणु, तेरा हुकुम काजे मानीन जीवसुन, ती ईनी वातेन पुरावु हय जासे, की आपणु, ईसु मसीक छाचलीन जाण लेदा। 4 जु कुय असु कह्वे की, “मे भगवान काजे जाणो।” बाकुन तेबी तारा हुकुम काजे मानीन नी जीवे, चु झुटु छे; ने तेरेमां छाचाय नी हय। 5 बाकुन जु कुय तारा बुल काजे मानीन जीवे, छाचलीन चु भगवानेन परम मां पुरुन-पुरु घुळाय गुयलु छे। तेरेसी आपणुक गुयो मालुम पड़े, की चु छाचलीन ईसु मसी साते जुड़ायलु छे। 6 जु कुय गुयो कह्वे, की मे ते ईसु मसी साते जुड़ायलु रव, ती तीना कवण्याक ते तसीत जीवाय जीवणु चाहजे, जसी जीवाय ईसु ईनी धरती पर जीवतेलु।
ईसुन हुकुम जु छे; आखाक परम करु
7 ए मारा लाटेक्ला साथी, मे तुहुं काजे काय बी नवलु हुकुम नी लिखतु, बाकुन चु जुन्लु हुकुम जु सुरु मां तुहुंक जड़लु छे; चो जुन्लो हुकुम जु बुल छे, तीनाक तुहुं सामेळला छे। 8 ती बी मे तुहुंक नवलु हुकुम लिखणे बाजी रयु। ने ज्य ते ईसु मां ने तुंद्रे मां छाचाला कवायसे; काहाकी आंदारलो छेटे हवतो जाय र्यो ने खरलो वीजाळो हय झजळणे बाजी रयो।
9 बाकुन जु कुय जुरदीन ज्य कह्वे की मे ते वीजाळाम रय-रवीन चुखु हय गुयु, बाकुन ईसुक मान्या भायस भीणी खर करे, चु हय लग पापेन आंदारलात मां जी रयु। 10 जु कुय, ईसुक मान्या भायस काजे परम करतु हय, चु छाचलीन वीजाळा मां रवे, ने चु कुय भीणी बी पापेन उत्तर नी बणे। 11 बाकुन जु कुय, ईसुक मान्या भायस भीणी खर करे, चु आंदारलात मां छे, ने आंदारलात मां जीवे। ने चु ज्य नी जाणे की मे कां जाणे बाजी रयु, काहाकी पापेन आंदारलो तेरा जीव-आत्मान डुळा काजे आंधळो कर देदो।
12 ए पुर्या-पारी, मे तुहुं काजे तेरेमां लिखणे बाजी रयु, की ईसुन नाव सी तुंद्रा पाप माफ हय गुया✡भजन सहीता 25:11। 13 ए आखा बासे, मे तुहुं काजे गुयो लिखणे बाजी रयु की जु ईसु कळ नी घड़ायी, ने पेहलेन छे, तीनाक तुहुं जुत छे, करीन वारु जाण रया। ए जुवान्या, मे तुहुंक गुयो लिखणे बाजी रयु की तुहुं ते वेरी भुतड़ा साते लड़ाय करीन तीनाक जीक लेदला छे। ए भगवानेन पुर्या, मे तुहुंक अळी गुयो लिखणे बाजी रयु की तुहुं ते सरग वाळा बासेक जाण लेदला छे।
14 ए बासे, मे तुहुंक तेरेमां लिखणे बाजी रयु, की जो सुरु सी छे तुहुं हीनाक जाणी गुया। ए जुवान्या, मे तुहुं काजे तेरेमां लिखणे बाजी रयु, की ताकत वाळा हय जावु, ने भगवानेन बुल तुंद्रे मां बणीन रवे, ने तुहुं हीना भुतड़ा सी जीती गुया।
15 तुहुं नीते कळी सी ने नी कळीन चीजो सी परम राखु कदी कुय कळी सी परम राखे, ती तेरेमां बासेन परम नी हय।
कुहर्या भुतड़ान वगे सी जड़नी, कळीन आखी वातेक परम मां, करु
16 काहाकी ज्य काय कळी मां छे, मतलब डीलेन लालच, ने डुळान लालच ने जीवणेन चीजेन मटाय, चु बास भीणी सी नी हय, बाकुन कळीत भीणी सी छे✡रोमी 13:14; नीतीवचन 27:20। 17 कळी ने हेरी लालच दुयु सर जासे, बाकुन जे भगवानेन मरजी पर चालसे, चु जलम बणीन रवसे।
ईसु मसीन वीरुद करन्या माणसेन वात मां मानु
18 ए मारा लाटेक्ला पुर्या-पारी, जी आकरी टेम छे, ने जसा तुहुं सामेळला छे, की मसीन वीरुदी आवणे वाळा छे, हेरे अनसारे हय बी बेसका मसीन वीरुदी उठसे; हेरसी हामु जाणजे, की जी आकरी टेम छे। 19 चे नीकळ्या ते हामरे मां सी, बाकुन हामरे मां सी नी हतला; काहाकी कदी चे हामरे मां सी रवता, ती हामरे साते रवता, बाकुन नीकळी हेरसी गुया काहाकी ज्य उजेंतो हवे की चे आखा हामरे मां सी नी हय।
20 ने तुहुं काजे भगवानेन चुखली-आत्मा आपली छे, तेरेमां तुहुं आखा छाचाय जाणु। 21 मे तुहुंक हेरसी नी लिख्यु, की तुहुं छाचाय काजे नी जाणु, बाकुन हेरसी, की तुहुं हीनाक जाणु, ने हेरसी की कुय झुट छाचाय भीणी सी नी हय।
22 लुच्चु कुण छे? चु, जु ईसु मसीन हवणेन नीकारु करे; ने मसीन वीरुदी हयुत छे, जु बासेन ने पुर्याक नीकारु करे। 23 जु कुय पुर्याक नीकारु हेरे धड़े बास बी नी हय जु पुर्या काजे मानी लेय, हेरे धड़े बास बी छे।
24 ज्य काय तुहुं सुरु सी सामेळला छे हयुत तुंद्रे मां बणीन रवसे; ज्य तुहुं सुरु सी सामळ्या, कदी चु तुंद्रे मां बणीन रवे, ती तुहुं बी पुर्या मां, ने बास मां बणीन रवसु। 25 ने तेरेसी हयु हामरे सी वायदु कर्यु चु जलम जीवसे।
26 मे जी बात तुहुंक हींद्रे बारामां लिख्यु, जे तुहुंक भुलवाड़े करीन नी। 27 ने तुंद्रे वाटे मसी हेरी चुखली-आत्मा आप देदु, ज्य हेरे भीणी सी करलो छे, ने तुंद्रे मां बणीन रवे; ने तुहुंक हेरो मतलब नी हय, की कुय तुहुंक सीकाड़े, बाकुन जसों हयु हेरी आत्मा आप देदु ज्य हेरे भीणी सी करलो छे तुहुंक आखी वात सीकाड़े, ने ज्य छाचो छे, ने झुटो नी हय ने जसु चु तुहुंक सीकाड़्यु असात तुहुं हेरे मां बणीन रवु।
आपणु भगवानेन अवल्यात छे
28 अळतेन ए भगवानेन पुर्या, हेरेमां बणीन रवु, की जत्यार चु उजेंतु हवे, ती हामुक हिम्मत हवे, ने हामु हेरे आवणे पर हेरे अगळ सरमायजे नी। 29 कदी तुहुं जाणु, की ईसु भगवान धरमी छे, ती ज्य बी जाणु, की जु कुय धरमीन काम करे, चु भगवानेन पुर्या-पारी बण गुया।