तीमुथियुस के लिए पौलुस की दूसरी पत्री
तीमुथी वाटे पोलुसेन दुसरी चिट्ठी
2 तीमुथीन बारामां
दीसरा तीमुथीन किताप नेवताळा पोलुस भीणी सी आपणा चेला तीमुथी काजे लिखली दीसरी चिट्ठी छे। दीसरा तीमुथी काजे पोलुसेन जीवणेन आकरी मां लिखाय गुयलो छे। च हीनी टेमे छे 1:16 दोरान रोम मां बुजायलु हतलु पोलुसेन तीमुथी साते गहरो रीस्तो हतलो ने हीयु हीनाक काय कावा पुर्यान रुप मां साप रुप सी कहें। फीलीपी 2:221 तीमुथी 1:2; 1:18
ज्य पोलुसेन चार चिट्ठीया मां सी एक छे ज्य एक मंडळीन बजाय एक माणुस काजे अगवाय करे दीसरा चिट्ठीया दीसरा तीमुथी, तीतुस ने फीलोमेन छे। दीसरा तीमुथीन लिखी जाणेन टेमे, रोमेन राजगादी मां मसी पर भुरसु करन्या माणसे काजे एला पाड़ रवला। काही मायन जी वजे हतली की पोलुस जेल मां हतलु ने तीमुथी काजे काठाय वेठणेन आदेस दी रवलु जसों की पेहला मां छे, पोलुस तीमुथी काजे लुच्चा सीकाड़ सी काय कावा चेताव देय 1 तीमुथी 1:16-18 चु तीमुथी काजे असु बी कवे ज्य मां कह्वे की आवणे वाळा दाहड़ा मां काठली टेम हवसे। 3:1
बाहरती वात
1. पोलुस तीमुथीन आव-भाव करने ने अळतेन हीनाक हिम्मत बांदान्ने साहरे सुरु करे। 1:1-18
2. अळतेन चु तीमुथी काजे दम धरीन चेतावणी देय। 2:1-13
3. हेरे पछेन चु हीनाक मामुली आदेस आपे। 2:14-26
4. अळतेन चु हीनाक आवणे वाळी घटनान ने सामनु करने सय तरीकान बारामां चेतावणी देय। 3:1—4:8
5. पोलुस तीमुथी वाटे थुड़ाक खुदेन राय साते खत्तम करे। 4:9-22
1
1 मे पोलुस, भगवानेन मरजी सी ईसु मसीन नेवताळु छे। ईसु मसीन साहरे माणसेक अमर जीवाय आपणेन भगवान वायदु करलु छे, ईनी खबरेन मे नेवताळु छे।
2 ए तीमुथीयुस, मे पोलुस जी चिट्ठी तुसे काजे लिखो। तु ते मार वाटे लाटेक्ला मुजुक छे।
आपणा भगवान बासेन ने आपणा मालीक ईसु मसीन दया, ने गीण-दया ने, सुक-सांती तुसेक जड़ती रहणु चाहजे।
पोलुस तीमुथीयुस वाटे भगवान काजे बेसकु वारु कह्वे
3 ए तीमुथी, तुसेक मे रय रय्न *स्मरणहेर करो ने रात दाहड़ु भगवान सी तार वाटे दुवा करो; ने तार वाटे ते मे भगवान काजे बेसकु वारु कहतु बी रव। आपणा डाहा-डाहा बी ईना भगवानेन सेवा कर्या, तेरी मे चुखला मन सी सेवा करो 4 मेसेक मालुम छे की मेसेक छुड़ीन तुसेक जाणु पड़्यो करीन तु बेसकु दुखी छे। तत्यार ते तु बेसकु रड़्यु। तारो रड़नु हेर करतु-करतु मारु जीव बी दुखे। तुसेक भेळु हवणे करीन बेसकु हेर करो; तुसेक भेळु हय्स ती मे खुस हय जायस। 5 तु ईसु पर छाचलीन भुरसु करे, ईना भुरसान वातेक मे हेर करो। जुत छाचलु भुरसु तारी आयसीन आयस लोइस मां हतली। ने जुत छाचलु भुरसु तारी आयस युनीके मां बी हतलु छाचलीन, हय जुत छाचलु भुरसु तारे मां बी छे। 6 हेरेसी मे तुसेक हेर कराड़तु जाय्न कह्वो; मे तार पर हात मेलीन वीन्ती कर्यु, तीने टेमे जु वाटु भगवान तुसेक आपलु छे, तीना वाटा काजे वारु रीते कामे लावतु रव। 7 ईनी वातेक घुण इसरु; भगवान आपणु काजे डरेन जीव-आत्मा ते नी आप्यु, बाकुन ताकुतेन, ने परम करनेन ने आपसा जीवेक मानाड़नेन जीव-आत्मा आप्लु छे।
8 हेरेसी आपणा मालीक ईसुन गवा देणे वाटे, तु घुण लाजवायु, ने मे पोलुस ईसु वाटे जेलेम कुंडाय रयु करीन बी मां लाजवाये; बाकुन भगवान आपे तीना जुर सी ईसुन खुस-खबर सामळावणेन काम वाटे दुख झेलने मां मारु साजल्यु बण। 9 भगवान आपणु छुटकारु आपलु छे, ने आपणुक चुखली जीवाय जीवणे करीन बुलावलु छे। आपणु काहना बी भला कामे कर्या करीन ते नी, बाकुन आपसी मरजीन अनसारे आपसी गीण-दयान साहरे चु आपणुक बचाड़न्यु ने बुलायु। आपणे पर ईसु मसीन साहरे गीण-दया देखाड़नेन युजना, कळ घड़ायणेन पेहले सीत भगवान बणावलु। एक कह्याम आपणुक जी गीण-दया †सनातनकळ घड़ायणेन पेहले सीत जड़ली। 10 ने हय भगवान छुड़ावणे वाळा ईसु मसी काजे धरती पर मकलीन आपसी जी गीण-दया उजेंतु कर देदु, ने आपसुन खुस-खबरेन परचारेन साहरे जीवाय्न वाट, हय अमर जीवाय्न वाट उजेंतु कर देदलु छे।
11 भगवान मेसेक ईसुन जी खुस-खबर आखेदुर सामळावणे करीन, ईसुन नेवताळु ने परचार करन्यु, ने सीकाड़न्यु बणावलु छे, 12 करीन मे हय ईना जेल मां ईना दुखो काजे झेलने बाजी र्यु। बाकुन तेबी मे नी लाजवायो काहाकी मे तीना पर भुरसु करो, तीनाक जाणो; मे ते मारा जीवेक तेरे भुरसे मेल रयु; मेसेक पाक्को मालुम छे, की चु भगवान, ईसुक पछु आवता लग मारा जीवेन राखवाळी करसे, जसा माणसे खजानान राखवाळी करे। 13 ईसु मसी पर भुरसु करनेन बारामां ने तेरे साहरे जड़न्या परम भेळ जीवणेन बारामां छाचली सीकापण तुसे काजे मारे साहरे जड़ली छे। जी सीकापण तार वाटे एक दाखलान तसी छे। हेरेसी ईनी सीकापण काजे ईनेत रीते चतराये पाळ्या कर। 14 जु चुखलु जीव-आत्मा आपणेम रवे तीना चुखला जीव-आत्मान मदतेन साहरे, तुसेक सुपली ईनी सीकापण काजे वारलु खजानो समजीन हेरी राखवाळी कर।
15 तुसेक मालुम छे की आसीया जीलाम सी आवला ईसुक मान्या आखा मारी सात छुड़ देदा; ने फुगल्यु ने हीरमन्यु लग जात रया। 16 असु करीन चु बेसका कावा मेसेक हिम्मत आपणे आवलु; मे पोलुस जेलेम साकळ्ये करीन बांदाय रयु करीन चु कदी नी लाजवायु। हेरेसी मालीक भगवान धड़े मारी वीन्ती जी छे। की चु उनेसीफीर्यान ने तेरा घराणा पर आपसी दया करे। 17 बाकुन उनेसीफीर्यु ते दीसरा आसीया देसवाळान तसु नी हय जत्यार चु रोम सहर मां आयु, ती चु मेसेक भेटणे करीन काळजी करीन हेर्यु, ने भेट्यु। 18 ईफीसुस सहर मां बी, चाकरीन काम उनेसीलीर्यु करलु छे, तीना चाकरीन कामेक तु बी वारुत जाणे। हय, मालीक भगवान नीयावेन दाहड़े तेरे पर बेसकु दया करनु चाहजे।