इब्रानियों के लिए पत्री
ईब्रानी वाटे चिट्ठी
ईब्रानीन बारामां
किताप एक हिम्मत बड़ावणेन चिट्ठी छे ज्य दरसावे की कसु ईसु जुन्डला नेमेन बेसकी भगवानेन अघी सी आवणेन वात काजे पुरी कर्यु। ज्य एक उपदेसेन तरा लिखी गुयो। ईब्रानी मां जुन्डला नेमेन 60 सी जादा दाखला छे ज्य साप रुप सी देखाड़े की कसु ईसु आवणे वाळी वात ने यहुदी मटला-पुजारान कामे काजे पुरो कर्या। हेरेसी जी किताप यहुदी ईसु पर भुरसु करन्या काजे हिम्मत बांदाड़ने वाळी हतली। ईब्रानी देखान्या की कसु ईसु कायदा काजे पुरु कर्यु काहाकी पुजारा काजे अळी कदी बादा नी आपणु पड़े। ईसु आखा पापे वाटे एक कावा ने जलम वाटे बादा हय गुयु। आपणा टेम मां ईसु पर भुरसु करन्या बी ईब्रानी काजे चिट्ठी मां हिम्मत जड़ सक्से की चे ईसु मसी पछळ चालता रवे, ज्य आपणे वाटे भगवान पर भुरसु करनु सय बणावे 12:2 ने सातेत हीना पर भुरसु करतु रवणु।
ईब्रानी काजे कुण लिख्यु ज्य कुय नी जाणे, बाकुन कायदा काजे जाणने वाळा नेवताळा पोलुस, लुका नीते बरनाबास जसु वीच्यार आप्या। लिखणेन तारीक बी हेर नी हय बाकुन बेसकान माननु छे की ज्य ईसु मसीन पयदा हवणेन 70 साल पेहल लिखी गुयलो। यरुसलेम काजे 70 मां खत्तम कर देदो, बाकुन हीनी चिट्ठी काजे लिखणे वाळु यरुसलेमेन बारामां वात करे जसु की ज्य हय लग खत्तम नी हयो। ईब्रानी काजे रोम सहर 13:24 मां लिखी गुयलो ने सय बेसका मंडळ्या मां खबर फेलाया।
बाहरती वात
1. लिखणे वाळु देखाड़े की ईसु भगवानेन अघी आवणे वाळी वात बताड़न्या ने सरग वाळा काहवाळ्या सी माहान छे। 1:1—4:13
2. अळतेन चु देखाड़े की ईसु हीनु पुजारा सी माहान छे ज्य यरुसलेम मां भगवानेन मंदीर मां सेवा करे। 4:14—7:28
3. सातेत ईसु सेवान काम हीनी जुन्डला वायदा सी बी मटा छे ज्य भगवान आपणा माणसे साते हीना कायदान साहरे ज्य हीयु मुसा काजे आपली हतली। 8:1—10:31
4. ज्य समजाड़णेन पछे ईसु आखी तरा सी माहान छे, लिखणे वाळु बेसकी वेहवारेन उपदेस देय। 10:32—13:17
5. आकरी मां लिखणे वाळु थुड़ाक हिम्मत देवाड़णे ने आव-भाव साते चिट्ठी काजे खत्तम करे। 13:18-25
1
भगवान हेरा पुर्यान साहरे आपणे सी वात करे
1 पेहला युग मां भगवान, टेमे-टेमे ने ईतरीक-ईतरीक करीन, वारु रीते, आपसा बेसका भगवानेन अघली वात बताड़न्या माणसेन अनसारे आपणा डाहा-डाहा साते वात करलु। 2 बाकुन हय कळीन ईनु आकरी दाहड़ा मां भगवान आपसा पुर्यान साहरे आपणे साते वात कर रयु। चु ईना पुर्यान साहरे आखी कळजुग घड़्यु, ने ईना काजे आपसी आखी कळजुगेन हकदार्यु बी बणायु। 3 जु पुर्यु ते भगवानेन खरलु सीकु छे। चु आपसान ताकतवाळा बुलेन साहरे आखी चीजेक सामळे। ने चु हेरा खुन सी आपणा पापे काजे धुय देदु, ने सरगे जाय्न आखाम ताकतवाळा बास भगवानेन जेवड़्ये आंग्ये बठ गुयु।
4 असु करीन भगवान तीनाक आपसी जागा आपीन सरग वाळा काहवाळ्या सी बेसकु मटु बणाय देदु। ने तीनाक तींद्रा नाव सी बी मटो नाव आप देदु।
भगवान सरग वाळा काहवाळ्या सी बेसकु मटु छे
5 काहाकी भगवान काहना बी सरग वाळा काहवाळ्या काजे, कदी असु नी कह्यु,
“तु मारु पुर्यु छे,
ने हय सी मे, तारुत बास बण गुयलु छे।”
ने काहनाक सरग वाळा काहवाळ्या काजे असु बी कह्यु,
“मेत तेरु बास बणीस;
ने चु मारु पुर्यु बणसे।”
6 ने जत्यार भगवान आपसा पेहला खुळ्या काजे ईनी कळी मां लावलु, ती तीनु, सरग वाळा काहवाळ्या काजे कह्यु,
“ए मारा आखा सरग वाळा काहवाळ्या, तुहुं आखा हेरी भक्ती करु।”
7 ने भगवानेन सरग वाळा काहवाळ्यान बारामां असो लिखलो छे,
जु आपसा आखा सरग वाळा काहवाळ्या काजे वाहळो बणावे,
ने आपसा चाकर्या काजे *धधकती आग आकठान लवळा बणावे।
8 बाकुन भगवान आपसा पुर्यान बारामां कहवे:
“ए भगवान, तारी राजगादी जलम लग टेकली रवसे!
तारा राजेन डंड नीयावेन डंड छे।”
9 तु नीयाव सी परम कर्यु,
ने कुहराय सी रीस करे।
तेरेसी भगवान,
तुसेक तारा साते वाळा सी जादा †हर्षरुपी तेलखुसीन तेल चुपड़ीन नेवाड़ लेदलु छे।
10 ने भगवानेन पुर्या काजे काहनुक कह्लु, चो खरला सास्तुर मां असो लिखलो छे,
“ए मालीक, तुत सुरु मां, धरतीक घड़्यु,
ने सरग बी तारेत हाते घड़ायलो छे।”
11 चे ते खत्तम हय जासे, बाकुन तु ते, तसुत रवसी;
आखी कळजुग पुथल्यान तसी जुन्ली हय जासे;
12 जसा माणसे जुन्ला पुथल्याक नाख दीन नवला पुथल्या पेहरे,
तसु तु जुन्ली कळजुग बणावसी। बाकुन तु ते, तसुत छे,
कदी नी बदले,
ने तु जलम जीवतेलु रवसी।
13 भगवान, आपसा सरगदुत मायन कुय काजे बी असु कदी नी कह्यु:
“जत्यार लग मे, तारा वेरीक,
तारा पाय मेलनेन पयड़ी नी बणाय दम; तत्यार लग,
तु मारे जेवड़ये आंग्ये बठ।”
14 वीच्यार करु! आखा सरग वाळा खबर-लावण्या ते, भगवानेन सेवा करन्या जीव-आत्मा अतरात छे। भगवान तीनुक छुटकारु हात करने वाळान सेवा-चाकरी करने करीन मकले।