2
मट्लु छुटकारु
1 तेरेमां आपणु काजे अळी वदु मन लागाड़ीन ईसुन बारामां सामेळ्ळी आखी वात पर पुरो मन लागाड़नु चाहजे, नीते कांखुर मायन आपणु छाचाय सी छेटा हय्न भटकी जासुन। 2 सरग वाळा काहवाळ्यान साहरे कह्वली खबर अतरे जुरे हतली, की तीनी वात काजे काटीन जु काहनुक तीनी वातेक नी पाळतेलु, तीना काजे डंड जड़तेलु। 3 वीच्यार करु! कदी आपणु ईसु मसीन साहरे जड़ला अतरा मटा छुटकारान नीकारु कर देसु, ती आपणु कसा काय बचसु? ईना छुटकारान बारामां आखान पेहले मालीक ईसु कह्लु, ने अळी जे सामळ्या चे हेरु पुरावु देदा। 4 ने भगवान बी आपसी मरजीन अनसारे गवा देण्या काजे चुखला जीव-आत्मान वाटु आपीन, तींद्रे साहरे सहलाणी, ने चकराड़े असा वारु काम, ने भाती-भातीन ताकतवाळा काम देखाड़ीन आपसी गवाय देतु रयु।
हामुक छुड़ावने वाळु
5 आवणे वाळी कळी काजे, तेरे बारामां आपणु वात करने बाजी रया, तीनी नवली कळजुग काजे भगवान, आपसा सरग वाळा चाकर्यान कब्जा मां करने करीन नक्खी नी कर्यु। 6 हेरे बारामां चुखला सास्तुर मां काहनेस जागे काहनुक असी गवा देदु,
“माणुस कुण कहवाये ने तीनाक तु हेर करे?
ने माणसेन पुर्यु कुण छे, तेरी तु फीकुर करे?
7 भगवानेन सरग वाळा चाकर्या सी थुड़ुक नानु छे।
तु तेरा मुणका पर हकेन ने *ईज्जतेन पागड़ीईज्जतेन पागड़ी बांदीन, राजान आव-भाव करे, तसोत तेरो आव-भाव करलु छे।
8 तु तारे अनसारे घड़ायली आखी चीजेक तेरा हक मां कर देदु।”
आखो काय माणसेन हक मां कर देदु, तेरो मतलब जो छे की भगवान, असी काहनी बी चीज तेरा हक मां करे पाखुर नी छुड़्यु, बाकुन आपणु काजे हय लग आखो काय माणसेन हक मां देखाव नी पड़े। 9 बाकुन हामु ज देखजे की सरगदुत सी नानु बणावलु छे, काहाकी भगवान आखो काय घड़लु छे, ने तेरे वाटे आखो काय घड़ायलो छे। करीन तीनाक जत वारु लागे की तेरु पुर्यु ईसु मसी, जु छुटकारु आपण्यु छे, चु माणुस बणीन ईनी कळी मां आवे ने भगवानेन दया सी बेसका पुर्या काजे सेक-सींगार मां लावणे करीन कुरुस पर मरनेन दुख झेले। 10 असु करीन भगवान, ईसु मसी काजे ईतरीक वार लग सरग वाळा काहवाळ्या सी नानुस बणाय देदु, ने चु ईसु, भगवानेन गीण-दया सी आखा माणसे वाटे मुतेन दुख झेल्लु। ने असु करीन भगवान तीना काजे सेक-सींगारेन ने ईज्जतेन पागड़ी पेहराय देदु।
11 काहाकी चुखु करन्यु ईसु, ने चुखा हवण्या आपणु एकुत कळीम सी छे। ने ईनी कळीन मुखी भगवान बास छे। हेरेसी ईसु आपणु भायस कहवायणे नी लाजवाये। 12 हेरेसी ईसु भगवानेक कह्यु;
“ए भगवान, मारा भायस्यो मां, हव मारा जाती भाय मां मे तारा नाव काजे सामळाया करीस,
हव तुसेक मान्या माणसेन टुळा मां तारीत बड़ाय कर्या करीस।”
13 ने ईसु अळी कह्यु, “मे भगवान मालीक पर भुरसु करीस।” ने ईसु, अळी कह्यु, “मे अतरुत नी, बाकुन जे पुर्या-पारी भगवान मालीक मेसेक आपलु, चे बी मारे भेळता छे।”
14 जसा भगवानेन पुर्या-पारी मास ने लुही मां भेसकाय रया, ती ईसु आपसुत बी तींद्रेन तसु हींद्रु †साजल्यु साजल्यु बण गुयु, काहाकी मुतेन साहरे हीनाक मुत पर ताकत जड़ली मतलब भुतड़ा काजे रीकामु कर देदु। 15 ने जतरा मुतेन डर सी जीवन भर गुलामी मां फसला छे, हीनुक छुड़ाय ले। 16 आपणु जाणजे की, ईसु, भगवानेन सरग वाळा चाकर्या काजे नी समाळे, बाकुन अब्राहमेन अवल्यात काजे समाळे। 17 हेरेसी असो हवणु हतलो की, ईसु आखी वातो मां आपसा मनख्या भायसेन तसु बणे; पापेन बादा छुटीन पापी माणसेक भगवान धड़े मेळ कराड़े ने असो करीन भगवान वगे सी एक दयाळु ने ईमानदार डाहलु मुखी पुजारु बणे। 18 काहाकी जत्यार पारख मां रय्न बी दुख झेले; ती चु तींद्री मदत कर सके तींद्री पारख हवे।