तीतुस के लिए पौलुस की पत्री
तीतुस वाटे पोलुसेन चिट्ठी
तीतुसेन बारामां
तीतुसेन किताप पोलुसेन चार चिट्ठी मां सी एक छे ज एक मंडळी वाटे नी बाकुन माणुस काजे बताड़ी जाय। ने दीसरी तीन चिट्ठी पेहला तीमुथीयुस दुसरा तीमुथीयुस ने फीलेमोन छे। पोलुस तीतुस काजे लिख रवलु बाकुन चे ज बी लिखलो की चिट्ठी काजे माणसे ईचमां जुर सी भणे हामु ज जान सकजे काहाकी चु हेरी अक्कल काजे एक नेवताळा रुप मां बताड़े काय असो हसे की तीतुस काजे पेहलुत सी मालुम हसे। पोलुस नक्खी ईसुन पयदा हवणे 63-65 सालेन ईचमां जी चिट्ठी लिखलु।
पोलुस तीतुस काजे करेत पाणीन ईचमां वाळी जागा मां मंडळीन अगवाय करने सीकापण देय पोलुस जी चिट्ठी हेरे करीन लिख्यु काहाकी तीतुस मंडळीन सीकला ने नेवाड़ला अगवाय करन्या काजे सीकापण देय। हीयु आपणा चिट्ठीया मां असु सीकापण तीमुथीयुस काजे आपे। हींद्री चिट्ठी मां बताड़लो छे की मंडळीन अगवाय करन्या काजे एक मट्ली जागा पर कसों मेकणु चाहजे। मंडळ्या काजे ने मंडळीन अगवाय करन्या काजे आजुन अगवाय मां जरुड़ी जागा पर धीयान राखणु चाहजे।
बाहरती वात
1. पोलुस तीतुस काजे धरमी अगवाय करन्या काजे नेवाड़ने सीकापण देय। 1:1-16
2. अळतेन हीयु हीना माणसे काजे भगवानेन जीवन जीवणे वाटे सीकाड़ने सीकापण आप्यु। 2:1—3:11
3. अळतेन आकरी मां हेरी थुड़ीक युजना काजे बताड़ीन वारु छे की कय्न सार देय। 3:12-15
1
1 पोलुस भीणी सी, जु भगवानेन पावर्यु ने ईसु मसीन नेवतावाळु छे,
भगवानेन नेवाड़ला*चुने हुए माणसे भुरसा काजे बड़ावणे करीन खरली वात बड़ावणे वाटे तीना काजे मकेलु छे, 2 तीनी अमर जीवनेन आसा पर, भगवान चु वायदु पेहलुन करलु छे, भगवान लुच्चाय मेलन्यु नी हय, 3 बाकुन संय टेम पर आपसा बुलेक तीना परचार सी उजेंतु करलु, जु हामरा मरण सी छुटकारु करने वाळु भगवानेन हुकुमेन अनसारे मेसेक सुप देदलु।
4 तीतुसेन नावेन जु भुरसा भेळु वीच्यार सी मारु खरलु पुर्यु छे।
भगवान बास ने हामरु मरण सी छुटकारु†उद्धारकर्ता करने वाळु मसी ईसु भीणी सी तुसेक गीण-दया ने सुक-सांती जड़ती रवे।
केरते मां तीतुसेन काम
5 मे असु करीन तुसे केरते मां मेलदीन आवती रवलु, की तु बचली वाते काजे सुदारे, ने मारी हुकुमेन अनसारे गांव-गांव मां नी डाहला बणावे। 6 जे नी-गुनावाळु ने एकुत बायरीन घरवाळु हय, तींद्रा पुर्या बी भुरसु करन्या हय, ने तींद्रे पर लुच्चाय ने तींद्रे मां नी मान्ने वाळा छे, करीन गुनु नी हय। 7 काहाकी मंडळीन मुख्या काजे भगवानेन पावर्यु नाते नी-गुनावाळु रवणु चाहे; नी हुकुम मान्ने वाळु, नी रीस वाळु‡रीस वाळु क्रोधी, नी पीने वाळु, नी लड़ाय करने वाळु, ने नी चुरी करीन खाने वाळु हवणु चाहजे। 8 बाकुन आव-भाव सी मेजवानी करने वाळु, भलाय करने वाळु, हुस्यार, छाचलु, चुखलु ने नीयम पर चालने वाळु हवणु चाहजे; 9 ने भुरसु राखणे लायक बुले पर काठा बणीन रहु; जे धरमेन सीकापणेन अनसारे छे, काहाकी खरली सीक सी दीसरा काजे सीकाड़ सके, ने फालतु वात पर बक-बक करने वाळान मुंहडा बी बंद कर सकजे।
10 ज तेरेमां जरुड़ी छे काहाकी बेसका माणसे खुद पर गम नी राखे ने फालतु वात बणायन दीसरा माणसे काजे बी भटकाड़े। मे खास करीन यहुदी माणसे काजे जी वात कय र्यु। 11 हींद्रो मुंहडो बंद करनु चाहे। जे माणसे फालतु कमाय वाटे जी वात फालतु छे, तीनी लुच्ची वात सी सीकाड़ीन घर की घर बीगाड़ देय। 12 तीनुत मां सी एक जणु चु तींद्रुत अघली वात बताड़ने वाळु छे, चु कह्लु छे, “केरती माणसे जलम लुच्चा, उजग्ला जनवार्या ने आपसात ने पेट भरता रहे।” 13 जी गवा छाचली छे, तेरेमां तीनाक वारुस लड़ीन चेताव की चे भुरसा मां पाक्का हय जाय। 14 ने यहुदीन माणसेन काहानीया ने तीनु माणसेन हुकुम पर मन नी लागाड़े, जे छाचली वाट सी भटकी जाय। 15 चुखला माणसे वाटे आखी चीज चुखली छे, बाकुन भुंडात ने नी भुरसु करने वाळा वाटे काय बी चुखलो नी हय नीते तींद्रु डीमाक ने अक्कल दुयु चुखलो नी हय। 16 चे कहें की हामु भगवान काजे जाणजे बाकुन तींद्रा काम सी तीनाक मना करे; काहाकी चे भुंडात काम ने नी हुकुम मान्ने वाळा छे, ने काहना भला काम करे असा नी हय।