3
Yesus em Moses elo Bakilewkabe em Weng te.
1 Sunbin-Got em yulo gaayemeko, akalem wiin so galmoko, yulo abiil tikin kasel keyemse kunum waneng yutaka! “Fein!”, dangbuluw Yesus e Sunbin-Got em kalan weng de telse kunum keko, num kunum ayem sel kebe kasike, yu em kukuw be kilele atebamoliwka!* Teing Bakamin 12:7; Kibulu 4:14; 7:26 2 Sua kel akate, Sunbin-Got e Moses elo aluwbamin mak dulewei, e aluwbamin be akalem am yol ka kel kilele aluwse kale. Beemdiw, Sunbin-Got e Yesus elo akalem wiin so galmoko, aluwbamin mak dulewei, e aluwbamin be kilele aluwse te. 3 Kate, yu fakam weng kale kilele ibolow fukunina! Am gebe kunum em wiin e akalem teing so gebe am beelo kalak dako, bakilewkabe te. Beemdiw, Yesus em wiin e Moses elo bakilewkabe te. 4 Nimtew angom? Am alik alik be kawtiw i teing so gesiliw kate, Sunbin-Got akalem ete mesesem mesesem angom alik alik be talfut kelewse kasike.
5 Feinka! Moses e Sunbin-Got em am yol beem sak weng afak kunum keko, em aluwbamin alik alik be kilele aluwse kale. Kanelewse beem mongom ete e fakam weng atew keko, Sunbin-Got em ibik ete nulo bokoyemoke weng be nulo kukuyemse te.* Teing Bakamin 12:7 6 Kate, Kulais e Sunbin-Got em Min keko, am yol beem fein atebin kunum kebe te. Yu kililina! Am yol beem mongom e kanekote: Kunum waneng i finganinba keko, kalaing kuw moko, diwkuw diwkuw Sunbin-Got em ding fenbuluw kunum waneng num kiskiw ete te.
Finengdako, bokoliw em Weng te.
7 Keko beli, yu Sunbin-Finik em weng kilele kililina! E bokolomele:
“Kame kuw yu Sunbin-Got em weng kililiw tewe,* Sim Fut 95:7-11
8 yu kanelom ibolow aimgeko, sakalaw keko, weng bo bo keko, yukalem kawalik kumel imdiw kebokoliw te!
Im kawtiw banim keko, ok so, ais so, alik alik mesesem banim aneng dim kakameliw ding dim bakate, eisneng mak ilo kak keyemei, i nelo sakalaw keko, weng bo bo kesiliw kasike.* Aneng Kolew 17:7; Teing Bakamin 20:2-5
9 Beem ding dim bakate, 40 kel itol kele ding e, ne auk so kitil so eisneng banban mak kukuyemkabi kate,
i nelo diwkuw diwkuw kiskis kenemsiliw te.
10 Kenemsiliw kasike, ne kaisuw keyemsomi, bokolomeli:
‘Diwkuw diwkuw i ibolow teifuluko, nem ilo kukuyemkakawkabi deiw be gelewinba kekabiliw te!’, angsi te.
11 Angsi kasike, ne weng fawtuk ayem weng mak bokolomeli:
‘Itel fein te! I nem finengdakamin abiw elo nam teliw te!’, angsi te.”,
angse kale.* Teing Bakamin 14:21-23
12 Nakunum kumel kunum waneng yu kilelbiko, boliwka! Mesik esik yom mutuk biliw kunum waneng mali mak i “Fein!”, anginba keko, ibolow mesemeko, finik so bin Sunbin-Got elo gal keleweko, elo kolewokoliw kasike. 13 Kate, Sunbin-Finik em weng kilikabiliw em ding dim kame ye, yukalem ete mali ilo kewkew weng mak bokolew bokolew kemoliwka! Mesik esik sili sili nam e yom mutuk biliw mali kunum waneng mak im ibolow aimgeyemei, ilo ibolow teifulu koyemoke kasike. 14 Yu kililina! Nu nukalem emisik elo “Fein!”, dangbuluw em kukuw be kame uneko, kuanokoluw ding dim akal, diwkuw diwkuw kilele aluw tewe, nu Kulais emdiw kesomi, eso fein fewtokokabiliw kunum waneng keko, alakabuluw te. 15 Yu weng kale iti kilele kililina! Sunbin-Got e bokolomele:
“Kame kuw yu Sunbin-Got em weng kililiw tewe,
yu kanelom ibolow aimgeko, sakalaw keko, weng bo bo keko, yukalem kawalik kumel imdiw kebokoliw te!
Im kunum waneng banim keko, ok so, ais so, alik alik mesesem banim aneng dim kakameliw ding bakate, eisneng mak ilo kak keyemei, i nelo sakalaw keko, weng bo bo kesiliw kasike.”,
angse kale.* Sim Fut 95:7-8; Kibulu 3:7-8 16 Kame yukalem ete kilele diweko, atemoliwka! Kawtiw im dim e Sunbin-Got e weng mak bokoyemse kate,
nelo sakalaw keko, weng bo bo kenemsiliw kawtiw bi kante ye? I Moses eso Isiw aneng fian be kolewsiliw kawtiw ite te.* Teing Bakamin 14:1-35
17 40 kel itol kele ding e, Sunbin-Got e kawtiw biso sakalala keyemse kawtiw bi kante ye? I kawtiw sili sili nam kesomi, kuaneko, im fom e kawtiw banim, ok so, ais so, alik alik mesesem banim aneng ka kel dukusiliw kawtiw ite te.* 1 Kolin 10:10
18 Sunbin-Got e kawtiw i ‘Itel fein te! Yu nem finengdakamin abiw elo nam teliw te!’, yangse kawtiw bi kante ye? I kawtiw elo sakalaw keko, weng bo bo kelewsiliw kawtiw ite te.
19 Kasike nu atemuwete: Kawtiw bi ikalem “Fein!”, danginba kebiliw ibolow beem mongom ete Sunbin-Got em finengdakamin abiw kawtem elo uninba kesiliw te.
*3:1: Teing Bakamin 12:7; Kibulu 4:14; 7:26
*3:5: Teing Bakamin 12:7
*3:7: Sim Fut 95:7-11
*3:8: Aneng Kolew 17:7; Teing Bakamin 20:2-5
*3:11: Teing Bakamin 14:21-23
*3:15: Sim Fut 95:7-8; Kibulu 3:7-8
*3:16: Teing Bakamin 14:1-35