2
Kiol Kukuyemin em Weng te.
1 Kate kukalem ete, ku mali ilo kilele fein kukuyemin kuw bakayem bolewka! Kukuyemin be kanekote:
Fasel Kawtiw im Dulum em Weng te.
2 Fasel kunum i kanelom wain ok banban waneko, teifulu kakamokoliw te! Kate i
mali kawtiw im kiin dim e wiin so kiol kuw kukuw so,
ken teinbin kukuw so, gelewsomi,
Sunbin-Got em weng kilele kal keko, elo “Fein!”, dangbiliw kukuw so,
ibolow mutuk dulew duluew kukuw so,
ilum toloke ding kabalak e, kinkinda ding fenbin kukuw so,
kukuw bete kuw gelewemoliwka! 3 Biimdiw, waneng fasel ikati Sunbin-Got akalem wiin galmose waneng imdiw keboliwka!
I kanelom weng anyam kelew kelew kebomeliwi,
wain ok akal banban wanbiliwi, wain ok be im kamok atew keyemboke te!
Kate i mali ilo ken kukuw kuw kaleyemboliwka!*1 Timoti 3:11 4 Kaneliw tewe, i ikalem nenggelel waneng biilo ikalem imok kumel so, aul so alik biilo ibolow dukayembin kukuw kaleyemboliwka! 5 Kaleyemsomi,
ken teinbin kukuw so,
sen banim kukuw so,
am eisneng kilele atebin kukuw so,
ken kuw kukuw so,
ikalem imok kumel ilo wangweng kemin kukuw so,
alik alik kukuw be mali nenggelel waneng biilo kilele kaleyem kemoliwka! Kanemiw tewe, mali kawtiw i ikalem “Fein!”, dangbiliw Sunbin-Got em weng beelo nam de mit da kolewiw kasike.*Efesus 5:22
Tanbelel Kunum im Dulum em Weng te.
6 Biimdiw, “Kunum tanbelel yukal ken teinbin kukuw gelewemoliwka!”, yangeko, kukuyem kemolewka! 7 Kukuyembelewi, i kom kukuw atemeko, ikati gelewemoliwka! Keko beli,
ku ken kuw kukuw gelewsomi,
kiol kukuyemin weng kuw kaleyemsomi,
mali im kiin dim e wangweng kunum kesomi,*1 Timoti 4:12
8 fein weng atite kuw kukuyemkabelew kasike,
maka i inkal kuluko, ki keko, nukalem dulum elote “Wa eisneng baka kai!”, angeko, nam weng miyembiw te.*1 Fita 2:15
Sak Weng Afak Biliw Kawtiw im Dulum em Weng te.
9 Sak weng afak biliw kunum waneng i ikalem kak kawtiw im afak kuw keko, im weng diwkuw diwkuw gelewsomi, im kiin dim e kiol kuw kukuw kemoliwka! I kanelom ilo yan weng wa mak duyemsomi,*1 Timoti 6:1 10 im mesesem mesesem eisneng mak yakut keyembokoliw te! Kate, i diwkuw diwkuw ikalem kamok kawtiw im kiin dim e atin kiol kuw kukuw kukuyem kemoliwka! Keemiw tewe, im kukuyemkabiliw kukuw ken be nukalem nulo finik so deiw mo koyemse Sunbin-Got em kukuyemin weng beem kait atite atew keloke te.
Kukuyemkemin em Weng Mongom te.
11 Nakunum Taitus kutaka! Sunbin-Got em ibolow folok e alik alik kunum waneng im dim kel fitewse te. Fitewse kasike, ilo finik so bin duyemomin deiw be alik alik im dim e busuko, alakabe te. 12 Busuko, alakabe kasike, nu Sunbin-Got em kiin dim e wa kukuw kebuluw e, kawin dim kaleem kal dim em “Kanela! Kanela!”, yangbe kukuw e, alik alik be kolewsomi, kawin dim kale kel alakabiliw kawtiw im kiin dim e ken teinbin kukuw so, kiol kukuw so, Sunbin-Got em kiin dim akal kiol kukuw so, kakamoluwka!*1 Sion 2:16 13 Kakabomeluwi, nu kame nukalem auk so kitil so, nulo sunsun finik so kulomin deiw kel mo koyemse Sunbin-Got Yesus Kulais em fitewokoliw ding feneko, alakabuluw te. Beem ding kabalak e, nulo kalfong fian duyemei, “Nu fein kulokoluw kai!”, angbuluw eisneng be nu fein atemokoluw te. 14 Feinka! Yesus Kulais be num gomet elo kuansomelei, “Im yan wa banim keyemo yo!”, angeko, num sili sili nam alik alik be sak misim kuw koyemse te. Koyemsomelei, e nulo akalem wiin so galmoko, “Nakalem angin yute te!”, yangeko, ging koyemse kasike kame, nu ken kukuw beem dulum elote “Ken keluma! Ken keluma!”, angakabuluw kunum waneng kebuluw te.*Aneng Kolew 19:5; Sawa Weng 4:20; 7:6
15 Keko kasike, ku Sunbin-Got em wiin dim e kitil kuw moko, weng kale diwkuw diwkuw mali ilo kukuyemsomi, mali im ibolow daoyemsomi, mali sakalaw keko, weng bo bo kebiliw kawtiw ilo weng kitil weng kuw sakalala keyembolewka! Nakunum a! Mali kawtiw i kanelom kulo desi kekembokoliw te!*1 Timoti 4:12