1 पतरस की सुरूआत की चिट्ठी
1 पतरस कर सुरुवात के चिट्ठी
परचा
1 पतरस के चिट्ठी प्रेरित पतरस दवारा लिखे गय रथै, पतरस अपन चिट्ठी के सुरुवात हे हइ कथै कि ऊ कोन रथै अउ करही लिखथै। ऊ उन सगलू मसीहियन के चिट्ठी संबोधित करिस जउन ऊ “अनचिन्हार” 1:1; 1:17 अउ 2:11 कथै उन अपन पढै बालेन के हइ मेर कइबेर संकेतिक करिस काखे ऊ अलगे-अलगे देसन हे बगरे हर रथै। काखे हइ चिट्ठी कुछ इफिसियन के लिखे गय रथै। पोलुस के चिट्ठी लग मिलत-जुलत हबै, बोहत मनसे मानथै कि 1 पतरस इफिसियों के बाद मसीह के पइदा के करीबन 65 साल बाद लिखे गय रथै। पतरस हइ चिट्ठी रोम सहर लग लिखे रथै जेही ऊ बाबुल 5:13 कहे रथै।
पतरस कथै कि ऊ हइ चिट्ठी तुमके प्रोत्साहन करै के अउ हइ बात के गवाही देय के निता लिखे हबै कि हइ भगवान के सच्चा किरपा हबै 5:12; 1 पतरस 2:11—3:7इफिसियों 5:18—6:9 अउ कुलुस्सियो 3:18—4:6 के बीच अक जसना हबै। हइ तीनो खंड परवार सबंध अउ आदेस के मानै बाले अधिकारिन के बारे हे उपदेस देथै। ऊ मसीहियन के प्रोत्साहन करथै कि जब दुख हे हबा, ता मजबूत रहा काखे आखरी लिघ्घो हबै। 4:1
रूप रेखा
1. पतरस अपन परचा देथै अउ अपन पढै के संबोधित करथै। 1:1-2
2. फेर ऊ उस मुकति के निता भगवान के धन्यबाद करथै जेही ऊ सबझन के साझा करथै अउ जउन उनखर जीवन के निता खास रखथै। 1:3—2:10
3. एखर बाद ऊ बिस्वासिन के उपदेस देथै कि कइसन दुनिया हे निक्खा मेर लग रहै के हबै अउ डउका अउ डउकी अउ हरवाह अउ मालिक के बीच कइमेर सबंध के संबोधित करथै। 2:11—4:11
4. एखर बाद पतरस उनके दुख सहै के निता प्रोत्साहन करथै। 4:12—5:11
5. फेर ऊ अपन चिट्ठी के समापत करथै। 5:12-14
1
सोगत
1 यीसु मसीह के चेला पतरस के तरफ लग हइ चिट्ठी भगवान के उन बगरे हर सेबक के नाम हबै, जउन पुन्तुस, गलातिया, कप्पदूकिया, आसिया अउ बितूनिया परदेस हे छिदिर बिदिर हुइके रथै, 2 जउन बाफ भगवान पहिलेन के ग्यान के जसना बोलाय गय हबा, अउ आतमा पवितर के दवारा पवितर करे गय हबा, जेखर लग उन यीसु मसीह के आदेस के पालन करै अउ ओखर खून छिडकाव के निता तुमही चुने गय हबा।
तुमही अनुगरह किरपा अउ सान्ति बोहत लग मिलत रहै।
अक्ठी जिन्दा आसरा
3 हमर परभु यीसु मसीह के भगवान अउ बाफ के धन्यबाद होय जउन यीसु मसीह के मरे हर मसे जिन्दा होय के दवारा, अपन बडी दया लग हमके जिन्दा आसा के निता नबा जनम दइस, 4 जउन फिरी हे तुम्हर निता स्वरग हे धररे हबै, ऊ हरमेसा के जीवन सुध्द अउ अजर हबै। 5 तुम्हर बिस्वास के दवारा भगवान के सक्ति तुमही ऊ मुकति के निता, जउन अबे परगट हबै, अउ आमै बाले टेम के आखरी हे परगट होमै बाले हबै।
6 हइ तुम्हर निता बडा मगन के बिसय हबै, पय जरूरी हबै कि अभिनैन कुछ रोज के निता सबैमेर के दुख सहै के पडथै। 7 हइ इहैनिता होथै कि तुम्हर परखे हर बिस्वास परिक्छा हे मजबूत निकरै, सोनो तो आगी हे पिघलाय जथै अउ तुम्हर बिस्वास नास होंय बाले सोना लग कहुं बोहत कीमती हबै, हइ मेर तुम्हर बिस्वास यीसु मसीह के परगट होमै तक परसंसा अउ महिमा अउ आदर इज्जत के कारन बना✡अयूब 23:1; भजन 66:10; यसा 48:10; याकूब 1:12। 8 तुम यीसु के कबहुन नेहको देखे हबा, तउभरमा ओखर लग माया करथा, अउ तुम उके हइ टेम नेहको देखत हबा, तउभरमा तुम ओखर हे बिस्वास करत हबा अउ असना खुसी अउ मगन लग जउन सोचबिचार लग बाहिर हबै, जउन भगवान के महिमा लग भररे हर हबै। 9 हइ बिस्वास के फडुहा हबै, तुम्हर आतमा के मुकति।
10 इहै मुकति के बारे हे उन ग्यानी मनसे बोहत खोजिन अउ जांच-पडताल करिन, उन दया के बारे हे जउन तुम्हर हे होमै बाले रथै, आगू कर बात गुठेय रहिन। 11 उन हइ बात के खोजिन कि मसीह के आतमा उन ग्यानी मनसेन हे रथै अउ आगुन लग ऊ मसीह के दुख अउ एखर बाद आमै बाले महिमा के गवाह देयत रहिस, ग्यानी मनसे हइ जानै चाहथै कि आतमा केतका टेम अउ कउन समस्या के तरफ इसारा करथै✡2 पतरस 1:21; यसा 52:13-14; लूका 24:25-27। 12 उनखर हे परगट करे गइस कि जब उन संदेस सुनाउत रहिन, तब उन अपन निता नेहको, पय तुम्हर सेबा के निता बात करथै। अब संदेस के परचार स्वरग लग पठोय हर पवितर आतमा के दवारा लग, तुमही उहै संदेस सुनाथै, स्वरगदूतो इन बातन के पूरी जानकारी हासिल करै के निता तइयार हबै।
पवितर जीवन जिये के बुलउवा
13 हइ कारन अपन-अपन दिमाक के कमर बांध के अउ सचेत रही के ऊ अनुगरह किरपा के पूर आसा रखा जउन यीसु मसीह के परगट होय के निता टेम तुमके मिलै बाले हबै। 14 तुम आदेस मानै बाले लरका बनके अपन इक्छा के मेर बेउहार झइ करा, जसना कि पहिले करे करत रहिन, जब तुमही ग्यान नेहको मिले रहिस। 15 पय जसना तुम्हर बोलामै बाले पवितर हबै, ओसनेन तुमो अपन सगलू चाल चलन हे पवितर बना। 16 काखे मूसा कर किताब हे लिखवरे हबै, “पवितर बना, काखे मै पवितर हबो✡लयबेवस्था 11:44; 19:2; 20:7।”
17 अगर तुम उके “हे बाफ” बिनती करके कथै, जउन दूसर के पक्छ लय बिना सबझन के कामन के जसना नियाव करथै, ता जब तक इछो परदेसी हे रथा, तब तक डर के जीवन जिया✡2 इति 19:7; यसा 59:18; भजन 28:4; इरमि 17:10। 18 तुम जानत हबा कि तुम्हर बेकार चाल चलन पुरखन लग चले आय हबै, ओखर लग तुमही मुकति सोना चांदी नास होमै बाले चीजन लग नेहको होय हबै✡भजन 49:7-8; गलातियों 1:4; यसा 52:3, 19 पय निरदोस अउ बिना पाप के गेडरा, मतलब मसीह के कीमती खून के दवारा हुइस। 20 ऊ दुनिया के सुरुवात के आगुन लग ठहराय गय रथै, पय हइ टेम के आखरी युग हे तुम्हर निता परगट हुइस। 21 उहै के दवारा तुम अबे तक भगवान के परति बिस्वासी हबै, भगवान ओही मरे हर मसे जिन्दा करिस अउ महिमा दइस कि तुम्हर बिस्वास अउ आसा भगवान हे होय।
22 तुम आदेस मान के सत्य के गरहन करे हबा अउ हइ मेर बिना कपट के हरमेसा माया के निता अपन आतमा के पवितर के लय हबै, इहैनिता अब तुमही सुध्द हिरदय अउ तन-मन लगाय के अक दूसर लग माया करै चाही। 23 तुम्हर नबा पइदा नास होमै बाले नेहको पय हरमेसा के जीवन मतलब भगवान के जिन्दा अउ सबदिन ठहरैय बाले बचन के दवारा होय हबै। 24 काखे सगलू देह चारा मेर,
अउ ओखर सोभा पतेरन के फूल के जसना हबै,
चारा मुरझाय जथै,
फूल झड जथै।
25 “पय परभु के बचन जुगजुग तक बने रथै, अउ हइ बचन ऊ संदेस हबै, जउन तुमही सुनाय गय हबै✡यसा 40:6-8।”