फिलेमोन के लिए पौलुस की चिट्ठी
फिलेमोन के निता पोलुस कर चिट्ठी
परचा
फिलेमोन के नानहस किताब पोलुस चेला1:1 दवारा लिखे गय रथै, पोलुस जब जेल हे रथै तब ऊ हइ चिट्ठी के लिखे रथै, जेखर मतलब हबै, कि ऊ सायद रोम सहर लग लिखे रथै, इहैनिता ऊ रोम सहर हे रथै ता इके यीसु के जनम के करीबन अकसठ साल बाद लिखे गय होही, जउन टेम हे ऊ कुलुस्सियो के चिट्ठी लिखे होही।
उन हइ चिट्ठी फिलेमोन नाम के अक्ठी मनसे के लिखे रथै, फिलेमोन मंडली के अक्ठी सदस्य रथै अउ अक्ठी दास के मालिको रथै, पोलुस उके हइ पूछै के निता लिखिस कि ऊ अपन दास उनेसिमुस के सजा झइ दे जउन फिलेमोन भाग गय रथै, रोमन नियम के जसना फिलेमोन उनेसिमुस के मउत के घाट उतारै के हक रथै, पोलुस, फिलेमोन कहुं अक्ठी मसीह भाई के रूप हे स्वीकार करै के निता, फिलेमोन के प्रोत्साहन करै के निता बिस्वास लग तरक के परयोग करथै, अउ इहो सलाह देथै कि उनेसिमुस के पोलुस 1:13-14 के संग सेबा करै के आदेस दय जाय।
रूप रेखा
1. पोलुस हे फिलेमोन के सोगत करथै। 1:1-3
2. तब पोलुस उनेसिमुस के पल्ला लग पूछथै कि फिलेमोन उके अक्ठी मसीह भाई के रूप हे स्वीकार करही। 1:4-21
3. पोलुस यातरा करै के इरादा घोसना करै के समापत करथै अउ सुभकामनाय पठोथै। 1:22-25
1
सोगत
1 यीसु मसीह के निता कैदी पोलुस अउ हमर भाई तीमुथियुस*तीमुथियुस पोलुस के सहकरमी अउ दोस रथै के पल्ला लग, हमर पिरिया संगी अउ संग-संग चले बाले फिलेमोन, 2 हमर बेहन अफफिया अउ हमर संगी सिपाही अर्खिप्पुस अउ फिलेमोन के घर अकजुट होय बाले मंडली के नाम।
3 हमर बाफ भगवान अउ परभु यीसु मसीह के पल्ला लग अनुगरह किरपा अउ सान्ति तुमके मिलत रहै।
फिलेमोन कर माया अउ बिस्वास
4 मै सबरोज भगवान के धन्यबाद करथो अउ अपन पराथना बिनती हे तोके सुरता करथो, 5 काखे मै परभु मसीह यीसु अउ सगलू पवितर मनसेन के पल्ला तोर माया अउ बिस्वास के बारे हे सुनथो। 6 मोर पराथना बिनती हइ हबै कि बिस्वास हे तोर संगति सक्रिय होय अउ तुमके हइ ग्यान मिलै कि हम मसीह के निता कोन-कोन निक्खा काम करै हे सक्ति हबै। 7 काखे हे भाई, मोके तोर माया लग बोहत खुसी अउ प्रोत्साहन मिले हबै, इहैनिता कि तोर दवारा पवितर मनसेन के मन हरा भरा हुइ गय हबै।
पोलुस कर दवारा निबेदन
8 इहैनिता मोके मसीह हे तुमके हइ आदेस देय के हक हबै कि तोर काहिन करै के सही हबै। 9 पय माया के आधार हे मै तुम्हर लग पराथना करै के निक्खा समझथो, मै पोलुस जउन अब डोकराय गय हव अउ यीसु मसीह के निता अब कैदी बन गय हव। 10 ऊ उनेसिमुस†उनेसिमुस पोलुस के सेबक रथै के बारे हे पराथना करथो, जउन तब मोर लरका बने रथै, जब मै जेल हे रथो। 11 अक्ठी टेम रथै जब ऊ तोर कउनो काम के नेहको रथै, पय अब न तोर निता बलुक मोरो निता बोहत काम के हबै।
12 मै अपन दिल के खन्डा के तोर लिघ्घो वापिस पठोथो। 13 मै ओही अपन लिघ्घो रखैके चाहथो, ताकि संदेस के निता मोके कैदी के ऊ तोर पल्ला लग सेबा के सकै। 14 पय मै तोर इक्छा बिना कुछु करै के नेहको चाहो, कि तोर हइ किरपा लग नेहको पय मगन लग होय।
15 उनेसिमुस सायद इहैनिता कुछ टेम तक तुम्हर लग लइ ले गय रथै कि ऊ तुमके सबरोज के निता मिल जाय। 16 अब सेबक के रूप हे नेहको, बलुक हरवाह लग कहुं बढके पिरिया भाई के रूप हे, हइ मोके बोहत पिरिया हबै, पय अब देह हे अउ परभु हे तुमके कहुं जादा पिरिया होही।
17 इहैनिता अगर मोके भाई समझता, ता इके उहै मेर अपनाबा जउन मेर मोके अपनाय हबा। 18 अगर तुमके एखर लग कउनो घाटा होय हबै या एखर उप्पर तुम्हर कुछु करजा हबै, ता उके मोर खाता हे लिख लेया। 19 मै पोलुस अपन हाथ लग लिखथो कि मै खुदय चुकाय देहुं, काहिन मै तोके सुरता देबाबा कि तुम्हरो उप्पर मोरो करजा हबै? तुम तो मोरेन हबा। 20 हे भाई, परभु के नाम लग मोके तुम्हर लग कुछ तो फायदा होय, तुम मसीह के कारन मोर हिरदय खुसी लग भर देया।
21 मै तोर उप्पर बिस्वास करत हइ चिट्ठी तुमके लिखथो, मै जानथो कि मै तोर लग जेतका कथो, तै ओखर लग कहुं जादा करबे। 22 अक्ठी बात अउ तुम मोर रहै निता कमरा जुगाड करा, काखे मोके आसा हबै कि तुम्हर सगलू पराथना बिनती के कारन भगवान मोके तुम मनसेन के फेरै लउटाय देही।
आखरी सोगत
23 इपफ्रास, जउन मसीह यीसु के कारन मोर संग जेल हे हबै, 24 अउ मोर संग-संग चले बाले मरकुस अउ अरिस्तर्खुस अउ देमास अउ लूका जउन मोर संगी हबै, तुमके नमस्ते कथन।
25 तुम सबके उप्पर परभु यीसु मसीह के अनुगरह किरपा अउ आतमा के संग बने रहै।