47
Ki jiin Babilonn doo buut po
1 Yennu din yet a, “Babilonn, fiit a naan gbant paak,
ki sik tiŋ ni, ki kar tanbiinii ni.
Sianyoo, a din tee nan sapaanmunn nae,
ki tee nan doo nba ki bi ki nyannir na,
ŋaan a ji ki ban be a yamani, mɔtana a tee yommike.
2 Ŋmantir naar na. Nant yon. Yitir a saarik na.
Liatir a liatŋana na. Torin a mɔkuuru na ki poot kpenii.
3 Nisaarii saa la-a yann ni.
Bi saa la ki bi sikina tiŋ ni, ki dinna fei.
N saa pa pann, ki sɔɔ kaa ki saa gɔɔrin.”
4 Israel teeb kasii Yennu-e nyinnit.
U sanne tee Yabint Daanɔ Yennu.
5 Yennu bia din yet Babilonn a, “Ii kar bunbɔnn ni kii ŋmin.
Bi ji kan yiina digbana poobati.
6 N wutoor din doo n niib paake,
ki n diab nan bi ji ki tee n yab na,
ki jiib teen a yiikoo ni, ki a ki timm ninbaauk.
Ki nikpera na gbaa, ki a diab nan ninmɔnn.
7 A dukin nan a sii yɔɔ tee poobate,
ki ki jii bona na ki teen a par ni,
koo ki dukii laa tan saa gbenn biaŋinba.
8 “Fin nba loon manu na, gbiintir linba na.
A dukii nan a be a yamanie, ki be fanu.
A dukii nan a tee nijaann nan Yennu nae,
ki sɔɔ kaa ki tee nan fin na.
A dukin nan a kan ban teen pakɔɔk, koo ki kɔŋ a waasi.
9 Ŋaan dayenn kɔɔ ni, yoo waaminnae,
ki bona ŋanlee na kur saa kpab tun.
Nan a nyɔku nba ki a tee na kur,
ŋaan a saa kɔŋ a sɔrɔ nan a waasa.
10 “A din teen a mɔŋ yadae, a toonbiit ni,
ki dukin nan sɔɔ kan la-a.
A yan nan a bannu nae kɔɔna muuk, ki a yet a mɔŋ a,
‘Mine tee Yennu, ki sɔɔ ji kaa ki tee nan min na.’
11 Ninbɔŋ saa baara, ki a nyɔkii na nan yenna kan fit gɔɔrir.
Biiru saa kpir baar a paak, ki tee biiru nba ki a ki ban dukin li po.
12 Ii dia a nyɔkii tingbangbirii na kur.
A bisin niwa, a tuu dia ŋanne ki tuun.
Li pasiar, li sii mɔk sommir ki tura, koo ki jeen a datai.
13 Faa lek la kpaanii nba na kur, ŋaan a ki mɔk yiikoo.
Ŋaant ki a ninnyɔdamm na n nyi paanu ki tinna.
Binba chakin ŋmaabira ki tuu bikin ki bɔkit sanpaak,
ki wanta ŋmaarik kur ni linba saa tun.
14 “Bi tee nan kakjina nae, ki muu saa dib.
Bi poŋ kan fit tinn bi mɔŋ kaawa.
Muyeruk na sii ton ki paakiba,
ki kii tee mumintik ki bi saa nanii.
15 Ninnyɔdamm nba ki a gaan kpaanii bi boor bisin niwa na,
bi kur saa yaat ŋaan nyika, ki sɔɔ kan biar ki tinna.”