48
Yennu-e tee Yomdaanɔ nba yen tɔɔnn po benu
1 Israel teeb, gbiintir na man, yimm nba tee Juda yaaboona na.
I poor Yennu sann nie, ki want nan i waa Israel teeb Yennu na,
ŋaan i ki fiin mɔbona nba ki i piak na po,
2 ŋaan bia faa parbia ki yeen a i tee kasii doo na niibe,
ki gaa Israel teeb Yennu nba sann tee Yabint daanɔ Yennu na paak.
3 Yennu piak Israel teeb a,
“Sianyoo n din pak linba tan saa tunewa,
ki tan te ki li tun nan barmɔnii.
4 N mi nan i tan sii tee tubkangbatae
ki sii wakii nan kut na, ki bia kaa naatuu nan kutmɔnt na.
5 N din bann i binbeŋ sianyooewa, ki pak bona na powa,
ki li tan tun maa n gɔɔri ki i daa yeen a
i pata nan i bonninnante te ki li tumi.
6 “Linba ki n din bunt na kur tuma;
li tee yin sake nan n buntaa na kur tee barmɔniie.
Mɔtana, n saa wanni bonsaana nba saa baar,
bona nba ki n ki ban fiit.
7 Mɔtanae ki n te ki li tuun,
linba na booru din ki mi tun kaawa.
Li-i mi tun, i bo saa yet a i mi li kura po.
8 N mi nan n kan ban teeni yada,
kimaan i yɔɔ tee kangaarnbae,
ŋanne teen ki i ki mi gbat linba na po faba,
ki li maan nan waama ki kɔɔ i tuba ni.
9 “N dia n wutoore ki diisir, n diare ki kan biiri,
a lin te niib n dont n sann.
10 N jii wahalae ki bikinii, nan baa tuu ŋamm kut
saauk muu ni biaŋinba na. Ŋaan n la ki i ki mɔk nyɔɔti.
11 Maa tun linba kur, n tuun n mɔŋ paake.
N kan te ki n sann n kɔŋ baakir,
koo ki te sɔɔ n chent nanin baakir nba tee n yar,
ki bia sii yɔɔ tee na.”
Ki jiin Sairus nba ki Yennu gannɔ na po
12 Yennu din yet a, “Gbiintir man,
yimm Israel teeb nba ki n yiini na.
Mine tee Yennu, ki tee piinu nan joontu, ki tee Yen-yemmir.
13 N niie din nan tingbouŋ na fiakir ki jɔnn sanpaak.
Mi-i yiin tiŋ nan sanpaak, bi tuu baare yian,
ki jii bi mɔŋ ki turin.
14 “I kur n tikir ki gbiint.
Patsiar din kan fit bunt nan jɔɔ nba ki n gannɔ na
saa lek Babilonn-i; u saa tun linba ki n loon wun tume.
15 Mine yiinɔ; mine saan nanɔ ki saa turɔ nyannu.
16 “Nakint n boor, ki gbat maa piak linba.
Pinpiik niwa, n din piak paanu nie,
ki tuu te ki n mɔbona na n mann mɔnii.”
(Mɔtana, Yabint Yennu-e turin u Seek ki tumin.)
Yennu lor nba jiin u niib po
17 Israel teeb kasii Yennu nba tinti na yet a,
“Mine tee i Yomdaanɔ Yennu, ki loon man tumii-i,
ki lii ŋan turi, ki wanni sɔnu nba ki i sii tɔkii.
18 “Yi-i bonni sak n sennii,
piisin bo sii puub ki teeni nan mɔkir nba ki fɔɔt nae,
nyannu bo saa baari nan nyunpana nba tuu baar gbingbann nae.
19 I yaaboona bo sii yab nan tanbiinii nae,
ki n bo kan te ki biiru n baaribi.”
20 Ii nyi Babilonn kii saa i yamani;
Ii hoot nan parpeenn ki jiin barŋanii maŋ po,
ki ŋaan sɔɔ kur n gbat siar kur boor a,
“Yennu tinn u toontunna Israel teeba.”
21 Yennu nba din jii u niib ki gar namm wɔruk tinkorik paak na,
ŋaan nyunnyukuru din ki soorib.
U din te ki nyun nyii tanpiiuk ni, ki bi nyu;
u din bɔkit tann nae, ki nyun nyii.
22 Yennu yeen a, “Biit damm ki be parmaasir ni.”