51
Ki jiin maan nba saa maan Jerusalem par na po
1 Ki Yennu yet a, “Gbiintir man, yimm nba loon tinnu na,
yimm nba baat n boor ki loon sommir na.
Dukint yaa din nyii tann nba ni na po,
ki dukin baa din gbiir ki nyinni tanpiiuk nba ni na po.
2 Ii dukin i yeeja Abraham po, ki bia dukin i yaa Sara po.
Maa din yiin Abraham yoo nba na, u din ki mɔk biki,
ŋaan ki n teen piisin u paak, ki turɔ waas.
Ki n te ki u yaaboona yabit ki kaa kann.
3 “N saa wann Jerusalem nan binba be langbent ni na,
n ninkpabauŋ.
U tiŋ nba lek tee tinkokirik na, ŋaan n saa teenir tinkpiasir,
nan kpaab nba ki n din teen Edenn ni na.
Parpeenn nan manu sii be leŋ,
ki dontir nan niipoturu yanii sii yiin leŋ ki teenin.
4 “Gbiintir turin man, n niib, gbiintir linba ki n piak.
N teen digbana n tumiiu, n sennu na saa turib yentu.
5 N saa baar yiame ki tinnib, n nyannu yoo na pera.
N mɔŋe sii dia digbana.
Digbanbanfɔka guu n baarue, ki guu nan dindann a man tinnib.
6 Gotir sanpaak, ki got tingbouŋ.
Sanpaak saa bot nan munyuut nae;
ki tingbouŋ n kpet nan kparchant na,
ki li niib kur saa kpo nan kpajuut nba kpenn biaŋinba na.
Ŋaan maa baat nan tinnu nba na sii yɔɔ be-e.
N nyannu nae sii tee linba see.
7 “Gbiintir turin man, yimm nba mi linba ŋan,
ki tee binba jii n tumiiu ki teen bi para ni.
I daa tiin jaŋmaanii, li-i tee ki niib yisimi ki sukii-i.
8 Bi tan saa mir bote nan tintɔɔk nba tuu tɔɔ tiɔk biaŋinba na.
Ŋaan tinnu nba ki n baat nann na sii yɔɔ be-e,
ki n nyannu na be yoo kur.”
9 Yennu, fiit ki sommit. Jiin a yiikoo na ki tinnit,
ki tun a yiikoo toonn nan faa din tun yaayoo ni biaŋinba na.
Fine din gbat Ijipt nba tuu naan mɔkir ni bonkob-paaruk na
burii burii.
10 Fine bia din te ki mɔkgbeŋir fɔɔr,
ki faa sɔnu mɔkgbeŋir maŋ ni,
a binba ki a tinnib na n fit poot.
11 Faa tinn binba na saa baar Jerusalem nan parpeenne,
kii yiin kii hoot nan kpinkpammuk.
Bi sii yɔɔ mɔk parpeenne, ki saa nyi parbiir nan yanyêtuk ni.
12 Ki Yennu yet a, “Mine kɔɔnta paŋ.
Bee ki a tiin nisaarik nba saa kpo na,
nisaarik nba ki yukii nan mɔɔt nba ki yukii na?
13 A tamm Yennu nba nama na poe, wunba tant sanpaak,
ki bia nan tingbouŋ fiakir na poe-e?
Bee ki a yɔɔ be jaŋmaanii ni ki jiin binba mukisa nan wutoor,
nan binba teen siir a bin biira na po?
Bi wutoor na kan ban siia ni.
14 Li kan wei ki bi saa ŋaa dansarkɔɔra na yann.
Ki bi manfoor saa fɔkit, ki bi sii di linba kur ki bi loon.
15 “Mine tee i Yomdaanɔ Yennu, mine tuu gbit mɔkgbeŋir,
ki te li nyunpana fu fuut. N sanne tee Yabint Yennu.
16 Mine jɔnn sanpaak, ki bia teen tingbouŋ fiakir,
ki yet Jerusalem teeb a, ‘I tee n niibe.
N turi n wannu, ki guuri nan n nuu.’ ”
Ki jiin Jerusalem biak gbennu po.
17 Jerusalem, fiit gɔɔn ni, kutir fiir.
A nyuu tubdatu nyubitik nba ki Yennu wutoor doo ki u tura,
a fan nyu nawa. A nyuur, ki li sike, ki te ki a tukintir.
18 Sɔɔ kaa ki saa ŋmakita.
I ni sɔɔ kaa ki saa soor a nuu ki ŋmakitani.
19 Biak munlee baarawa, tɔb biir a tiŋa, ki a niib tun kon.
Sɔɔ kaa ki saa tina ninbaauk.
20 Sɔngɔnt boor kur, gbananchɔkinte tuu te ki a niib n baa,
bi tee nan waarɔ baruk nba tuu soor piarɔ nae.
Yennu wutoor paŋ na gbatiba.
21 Yimm Jerusalem teeb nba di wahala na,
yimm nba tukintir nan i yib na,
22 i Yomdaanɔ Yennu kɔn i paak ki yeen a,
“N jikit nyubitik nba ki n bo be wutoor ni ki n turi nae,
ki yaatir nann. I ji kan ban nyu daan nba te ki i tukintir na.
23 N saa jiir ki tur binba dinti biak nae,
binba te ki i dɔɔ sɔnjot ni, ki bi ŋmaat i paak nan i tee tante na.”