52
Biaŋinba ki Yennu saa tinn Jerusalem
1 Jerusalem, a ŋamm kii mɔk paŋ kii paar.
Yennu kasii digbann, a lia baakir.
Binba ki mi Yennu ki bia ki yeen na ji kan ban kɔɔ a ni.
2 Jerusalem, yokin a mɔŋ, ki yent a mɔŋ.
Fiit tiŋ ni ki kar a naan gbant paak.
Cheet bant nba ki bi baana na,
yimm Sayɔnn teeb nba be yommisin ni na.
3 Ki Yabint Yennu yet u niib a, “Yaa din teen daaba, bi din ki pa likirii i paaki; li paak, siar kan pa kaawa ki bin ŋaai. 4 Yaa din saan kar Ijipt ki tee boorganu na, i din saan i yanbɔɔte, ŋaan Asiria din tan jii-i nan ninmɔnne ki yaat nani, ki bia ki pa siar i paaki. 5 Ki Babilonn tiŋ ni, li boorue bia tun na. I tee yommiie, bi ki pa siar i paaki. Binba dia-i na dont bi mɔŋe, ki faa kpinkpant ki ki gorii gbootin. 6 Yoo baate ki i tan saa bann nan mine tee Yennu ki pak turi.”
7 Li fan bonchiann nan ki a la toomii ki u nyii kunkona paak,
ki baat nan labamann, ki li tee parmaasir barŋanii.
U mɔɔntir nyannue ki piak Sayɔnn a, “A Yennu-e tee kpanbar.”
8 Binba guu doo maŋ na lakin hoot parmaasir hootiie.
Bi fit laat nan bi tiɔŋ ninbina biaŋinba ki Yennu jent Sayɔnn.
9 Yimm Jerusalem langbent, ii hoot parpeenn po man.
Yennu saa tinn u doo, ki maan u niib para.
10 Yennu saa jii u kasii paŋ na ki tinn u niib,
ki durinya niib kur saa lar.
11 Yimm nba jii jiantu diiuk bona na, ii yabir ki nyi Babilonn.
I daa siit linba tee kɔɔr bont; ii teen i mɔŋ kasii, kii nyi.
12 Yoo nba na, li ki tee i saa nyi kpirik kaa,
i kii koor a yin mir boti.
I Yomdaanɔ Yennu-e saa gar i tɔɔnn,
ki guuri li munn po.
Ki jiin toontunnɔ nba di biak na po
13 Ki Yennu yet a, “N toontunnɔ saa la nyannu u toona niwa,
u saa la baakir bonchiann.
14 Niib bonchiann nba din lau, bi gbanant din jeke;
bi din biir u gbanant bonchiann ki u ji ki naan nirɔ.
15 Ŋaan mɔtana li saa yaar lit digbana bonchiann u paak,
ki li saa teen kpanbara bakitnauŋ, ki bin muu mɔi.
Baa ki ban la linba, ŋaan bi tan saa lar, ki bia bannir.”