1 Ki Job jiin a: 2 Bee ki i mantik biir n par nan maami? 3 I sukiin yoo nan yoo, ki ki tiin fei nan yaa sukiin biaŋinba na. 4 Mi-i lekii tun kpetiie, li biiri nlee? 5 I dukii nan i cheeme, ki jikit n daamii na ki sent, ki li tee n toonbiit paaki. 6 I ki laat nan Yennu-e tuun linba na-a? U pii baruko, a lin soorin. 7 Ki n pak u biiru na paak, ŋaan sɔɔ ki gbiint turimi; sɔɔ ki gbat mɔnii nba ki n mɔ loon barmɔnii na. 8 Yennu gɔɔr n sɔnuwa, ki n ji kan fit saan; u bɔr n sɔnu ki li be bunbɔnn ni. 9 U jii n mɔkint kur ki yaat nann na, ki biir n sann. 10 Ki u boon lokir kur po, ki ŋabir n dindann kur, ki nyikin a man koor ki kpo. 11 Yennu donn wutoor nanin ki li saa yakira, ki dian nan n tee u dataake nan barmɔnii na. 12 U tuun kunkɔnkɔnna ki bi lekinin, ki gbii bunbunii ki lintir n ŋaak, ki guutin a bin lekin.

13 Yennu te ki n ninjamm yêtima; ki n tee saamɔ ki tur binba bo mima na; 14 ki n nikpiimm nan n yɔɔsnba na seet n boor. 15 Binba ki n bo gaamm saauŋ n ŋaak ni na tamm n powa; ki poob nba tee n ŋaatoontunna na ji dian nan n tee saamɔ, koo boorganue na. 16 Ki mi-i yiin n toontunnɔ, u ki toon, mi-i lekii barimɔ maa wun sommin gbaa. 17 N nubiru paak n ŋaapoowa, ki n mɔŋ ninjamm ki fit nakiimi. 18 Ki waas yisimin ki laan, yoo nba ki bi lan. 19 Ki n yɔnanmɔnii goriin ninkpianii; ki binba ki n mantik lomm na yêtin; 20 ki n gbananbɔŋ laak n kpaba paak; ki li tenn waan nan n manfoor n bo gbenn.

21 Yimme tee n yɔɔsnba. Tinimin ninbaauk. Yennu nuue faa birin. 22 Bee ki i waa mukisin nan Yennu nba mukisin biaŋinba na. Yaa turin parbiir biaŋinba na, li ki jaŋi-i?

23 N sunman ki sɔɔ n bo tiar n mɔbona nae, ki sɔbir gbouŋ ni, 24 koo ki bo jii sirik ki jab n mɔbona na tann paak, ki lin te lii be mɔkmɔk nan mɔkmɔk. 25 N mi nan n Tinntɔɔ be, ki tan saa baar tingbouŋ na ni li joontu, ki sommin. 26 Yiaru-i lekii biir n gbananbɔŋ na, ŋaan n sii be n gbanant nie ki la Yennu. 27 N saa lau nan n mɔŋ ninbina, ki u ji kii tee saamɔ.

Ki n kɔŋ pardɔɔnn, kimaan yaa yet a, 28 “Nlee ki ti saa teenɔ tonti-i?” Ki i kpaan yaa saa jii linba ki nyiirin ki lekin. 29 Mɔtana i ji tin jukbanjiak na jaŋmaanii, kimaan yanbɔmm paak ki Yennu saa donn wutoor, ki jii u jukbanjiak na ki dat niib tuba, ki li saa te yin bann nan sɔɔ be ki tee buut daanɔ.