1 Ki Sofar, wunba tee Naama booru ni nirɔ na jiin a: 2 Job, a ŋmat n yame, ŋaan n mɔk sukuru ki saa tura gatu. 3 Faa yet linba na tee sukite, ŋaan n mi maa saa jiina biaŋinba.

4 Barmɔnii, a mi nan laa nyii yaayoo ni, yoo nba ki Yennu din nan nisaarik tiŋ na paak ki tan tuu mɔtana, 5 nibiiuk ki ban mɔk parpeenn ki li yukii. 6 Ki u dont-n-mɔŋ saa fit kpaat ki tuut sanpaak, ki u yur siit sanpagbant, 7 ŋaan u tan saa bote nan tanbiinii na, ki binba tuu miuwa na ji sii birise nan waa saan siaminba. 8 U saa bote nan damiit na, koo nan faa tuu la yirintu biaŋinba nyiɔk na, ki sɔɔ ji kan ban lau. 9 Ki u saa yaat siaminba ki u tuu kɔɔ na, ki bot. 10 Ki u waas tan saa jiin waa fat linba nandamm boor na. 11 U gbanant tuu paane, ki mɔk paŋ, ŋaan li kan yukiri ki li saa kpant tanbiinii.

12-13 Toonbiit tumu mantik man ki turɔ, ki u tent siar u mɔb ni, a li manu n maŋɔ. 14 Ŋaan jeet na tuu toŋe u poor ni, ki toŋ ki tee nan lɔbii nba tee biaŋinba. 15 Nibiiuk tuu tan wukit mɔkint nba ki u jan nae; Yennu-e tuu tan nyinnir, wuu lekii nakir u poor ni. 16 Nibiiuk nba nak linba tee nan lɔbii nae, li kpiue nan waatouŋ nba junt ki kpi biaŋinba na. 17 U kii be u manfoor ni ki tan la kpan nba sii puub nan mɔka na, koo ki la naabiin nan siat puub nan kpenii na. 18 U tan saa jii waa tun la linba kure ki tur; ki tan kii mɔk yaak nba saa di u mɔkint na, 19 kimaan u tuu diin nandamm nae, ki bi be fara ni, ki bia fiar ŋei nba ki leeb maa na. 20 Ki siar ki kpeent u nianchiɔŋ na. 21 Wuu dii yoo nba, siar ki tenti. Mɔtana, u mɔkint gbennue na. 22 U mɔkint na nba yab biaŋinba na, ŋaan ninbaatir saa baarɔ ki biirɔ. 23 Ŋaant ki wuu di linba kur ki u loon. Yennu saa donn wutobiir ki dat u tubir. 24 Yoo nba ki u koor a wun chiar nyi kutbin jukbanjiak ni na, kutmɔnt tɔrbanne saa yekɔ ki birɔ. 25 Ki peenii na daat saa ŋmuu saar u gbanant, ki li mɔporimii nba ŋmuu siaminba na, sɔn sii nyi leŋ, ki u yan saa put, ki jaŋmaanii n soorɔ. 26 Ki linba kur ki u mɔk na saa biir; muu nba ki nirɔ ki joo na saa di ŋɔɔ nan u ŋaateeb kur. 27 Sanpaake fiitir jɔɔ na toonbiit, ki tingbouŋ na di siara ki biirɔ. 28 Ki u mɔkint na kur saa biir, yoo nba ki Yennu wutoor saa do na.

29 Linba nae tee nibiit nyɔɔt, ki tee joontu nba ki Yennu sennib.