3
Ki jiin tubdatu nan lebitu nan dindann po
1 N tee daanɔ nba mi Yennu tubdatu nba tee biaŋinbae.
2 U ber sikinin bunbɔncheenn nie,
3 ki yɔɔ faan niikura, ki ninbaauk kaa,
4 ki tan te ki n gbanant tee fiat fiat, ki bia kɔnn n kpaba.
5 U kɔɔnin dansarik nba tee ninbaatir nan parbiir nie,
6 ki mabin ki n be bunbɔncheenn nba naan kuun na ni.
7 Ki u baanin jarit, ki n tee yommik,
ki ki mɔk dindann nan n tan saa paaki.
8 Ki n yikin sanpaapo ki loon sommir,
ŋaan ki Yennu yêt wun gbiint.
9 Ki n somm lian, ki tana joona gɔin siaminba kur ki n tɔkin.
10 Ki u guun nan naamuuk nba tuu guu biaŋinba na,
ki chibin nan yanbɔr nba tuu chib biaŋinba na.
11 Ki u wei ber nyinnin sɔnjouk na ni,
ki patin buri buri, ki nyikin.
12 Ki u dat u tɔrbann na,
ki n tee jabenn nba ki u saa tɔ peenii.
13 Ki u yek u peenii na, ki li kɔɔ n gbanant ni.
14 Ki niib laan daar kur, ki n tee nilaakir bi boor.
15 U te ki n di farbiiuk, ki li tee nan jeet nan nyun na.
16 Ki u duur n numm nan tiŋ, ki kɔnn n nyana tana paak.
17 Ki n tamm laafia nan parmaasir nan parpeenn nba tee biaŋinba.
18 Ki n ji ki mɔk yoo saan ki sii be n manfoor ni;
n dindann nba ki n mɔk nan Yennu na ji kaa.
19 Mi-i dukin n gbananyekitir po nan maa ki mɔk binbeboor na,
li tee lɔbii nba tone.
20 Ki n yɔɔ dukii li po, ki be ninbachiɔŋ ni, ki butin.
21 Ŋaan n dindann lek tuu jen yoo nba ki n tiar bonyennkɔɔ na poe:
22 Yennu ninbatinu na yɔɔ be-e, ki u lomm kaa gbennu.
23 Yennu lomm paane sanyiɔk kur, ki u ŋant na yab bonchiann.
24 Yennu kuukɔɔe ki n mɔk, li paak, u nie ki n mɔk dindann.
25 Yennu ŋan ki tur wunba kur teenɔ yada.
26 Li paak li ŋan ki tin guur nan sukuru, ki wun tinnit.
27 Li mantik ŋan ki tin tumii sukuru na booru, bisin niewa.
28 Li-i tee ki ti di wahala, li ŋan ki tin kar soon nna nan sukuru.
29 Li ŋan ki tin gbaan nan mɔsaku,
kimaan li ki gar dindann tan sii be.
30 Bi-i lekii boot, ki bia sukiit, li ŋan ki tin gaar li kur.
31 Yennu mɔk ninbatinu, ki kan nyikit fas fasi.
32 U saa fit te ki parbiir n baarit,
ŋaan u lomm nba ki u be nant na tee barmɔniie, ki mɔk paŋ.
33 Li ki manɔ, li-i tee ki ti be parbiir nan gbanantont ni.
34 Yennu mi yoo nba ki ti sei be mukir ni.
35 Yennu mi yoo nba ki bi fiarit mɔnii nba ki u turit na ni.
36 Yoo nba ki barmɔnii ki piak buut boor na, ŋaan u mi li po.
37 Yennu loomm kuukɔɔe tuun yoo kur.
38 Bonŋann nan bonbiir kur tuun nan waa senn biaŋinba nae.
39 Bee paake ki ti sii mɔk bunburimii,
li-i tee ki ti la tubdatu ti toonbiit paaki?
40 Ŋaant ki tin fiit ti binbeŋ, ki jen Yennu boor.
41 Ŋaant tin loot ti para, ki miar Yennu nba be yendɔuŋ ni na.
42 “Yennu, ti tun yanbɔmm ki biirawa, ki a ki nyik chabiti.
43 “A wei berite, ki kpiit, ki wutoor dɔɔk a ninbatinu na paak.
44 A wutoor na tee nan sanpagbouŋ nae,
ki mantik kpakii, ki ti miaru kan fit gar baara ni.
45 A lute nan ti tee bonjakina na, boorganu ni,
46 ki ti datai na kur sukiit ki bia laat,
47 ki ti kpan be baak nan biiru ni,
ki be ninbɔŋ nan jaŋmaansooruk ni.
48 Ki ninnyuut nyi n ninbina ni ki puub nan kpenu na,
kimaan n niib biiru na paak.
49 “N ninnyuut na sii yɔɔ puube,
50 ki tan tun yoo nba ki Yennu saa got sikin ki lat.
51 N tuu la parbiire,
li-i tee ki n laat linba baar doo na poob paak.
52 “Ki n datai nba namin kaat na soorin
nan baruk nba tuu soor nɔɔŋ biaŋinba na.
53 Ki n fo, ŋaan ki bi lun bootuk ni, ki biin tann li mɔb paak.
54 Ki nyun na yaa lin piinin, ki n ji mi nan kuun nakinima.
55 “Yennu, ki n be bootuk na tiŋ po ki yikin teena.
56 Yoo nba ki n tan barima, maa fan gbiint n mɔnii na, ki a gbat,
57 ki gat turin, ki yetin a n daa tiin jaŋmaanii.
58 “Yennu, ki a tan baar ki fatin, ki tinn n manfoor.
59 A kɔn n paak, ki mi baa tun bonkpeta nba ki biirin.
60 A mi n datai na nba namin, nan baa lorin n paak biaŋinba.
61 “Yennu, a gbat baa sukiima; a mi bi lora kur.
62 Ki bi piak n paak daa kur ki lorin bi lora.
63 Ki bi tuu piin sanyiɔk ni ki laan, ki tan tuu nyiɔk.
64 “Yennu, a dat bi tuba baa tun linba na paak.
65 A sat mɔtont bi paak, ki ŋaan bin kɔŋ bi dindann.
66 A wei berib nan wutoor, ki boontib tingbouŋ na paak.”