2
Ki jiin Jerusalem teeb tubdatu na po
1 Yennu din donn wutoor ki te bunbɔnn piin Sayɔnn.
U te ki Sayɔnn mɔkint bonchiann biir,
ki nyɔr nyik u ŋasaakak na,
daar nba ki u be wutoor ni na.
2 Yennu biir Juda digbanbis kur, ki ninbatinu kaa;
ki bit joonpaara nba guu doi na,
ki te digbann na nan li diara dii fei.
3 U be wutoor ni, ki biir Israel teeb paŋ buri buri.
U yêt wun sommit yoo nba ki ti datai baar na,
ki fiir ti paak nan muu na, ki boont bona kur.
4 U tɔ u peenii na ti paak, ki li tee nan u tee ti dataake na,
ki kpii binba kur ki ti numm gboob
ki bi tuu maant ti para na.
Jerusalem na nie ki ti bann u wutoor nba do ti paak biaŋinba.
5 Yennu biir Israel teeb nan u tee bi dataake na,
ki te bi joonpaara nan nijaana ŋei kpant langbent,
ki te parbiir nba kaa gbennu baar Juda teeb paak,
6 ki yeer ŋasaakak nba ki ti jiantirɔ li ni na buri buri,
ki gɔɔr kasii daa nan foon daa na,
ki kpanbar nan mannteeb na kur la u wutoor
nba doo bi paak biaŋinba.
7 Yennu yêt u maruŋ binbintir na,
ki bia biir u kasii ŋasaakak nawa,
ki te dataak na yeer joona na,
ki bi yikin a bi la nyannu,
siaminba ki ti tuu jiantir Yennu ki mɔk parpeenn na.
8 Yennu-e lor nan Sayɔnn joona na n baa;
u bikin li yarimu ki sak nan li saa biir fas fas,
ki li difoot nan joona na kur ji biar tee langbent.
9 Ki li gana na pii tangbiina ni,
ki ganchaata na jint buri buri.
Ki leŋ kpanbar nan li nijaana na ji tee yommii digbangann ni.
Bi ji ki want Yennu sennii na,
ki sɔkiniinba na ji ki laat yirintu ki li nyi Yennu boori.
10 Ki Jerusalem nikpera na kar tiŋ ni ki ŋmin soon nna,
ki puk tanbiinii bi yura paak, ki bia lia bɔtoliant,
ki sapaanbis na tibint bi yura nan fei.
11 Ki n ninbina ji bak nan mɔnii; ki n kpak nyann.
N ji bake nan ninbaatir, kimaan n niib nba kpo na paak.
Ki waas nan sanpantii kpenn doo na sɔnjot ni.
12 Ki kon nan nyunnyukuru sob,
ki bi fabin ki teen bi naanba,
ki baa sɔnjot ni nan bi turib danii na,
ki ji kpenn bi naanba nii ni.
13 Jerusalem, n mantik loona, n saa pak a bee?
Nlee ki n saa maan a pari?
Sɔɔ daa ki ban dii biak nan linba na na.
A biiru na yab, ki tee nan mɔkgbeŋir nba yab biaŋinba nae.
Ki siara dindann ji ki be.
14 A sɔkiniinba na ji ki mɔk siar ki saa beta,
see bin faar faak kuukɔɔ.
Bi mɔmaan na kpannae, bi ki pak fiit a toonbiit na.
Bi te ki a ki mi nan li kpaa talas nan fin lebit a binbeŋi.
15 Ki niib nba gaar fin Jerusalem boor na yisima.
Bi pakin yura, ki laa a biiru na paak, ki yeen a,
“Digbanŋann nae na-a?
Doo nba ki tingbouŋ na tuu dontir u mɔŋ li paak nae na-a?”
16 A datai na kur sarikita, ki goriia jia-a nan naŋ,
ki mian bi mɔi ki yeen a,
“Ti biirira, daar nba nae ki ti tuu guu.”
17 Yennu poŋ tun waa lor a wun tun linbawa.
U biirite, ki ninbatinu kaa,
nan waa din wannit sianyoo biaŋinba na.
U te ki ti datai na la nyannu, ki te bi kpamm ti biiru na paak.
18 Jerusalem, a te ki a joona na n fabin ki tur Yennu.
A te ki a ninnyuut-ii puub nan mɔkir na, yonnu nan nyiɔk.
Ii mɔ nan ninbaatir, ki tan baŋ.
19 A tuu fiir nyiɔk kur kii fabin kii teen Yennu.
A loot a par, ki barimɔ ki wuu mɔk ninbatinu
a waas nba kpenn kon sɔnjot ni lokir kur po na paak.
20 Yennu, gotirii. Bee ki a mantik daar ti tuba nna?
Poob ŋman bi waas nba ki bi loomm na nante.
Ki bi kpi mannteeb nan a sɔkiniinba na, a ŋasaakak na ni.
21 Nipaauŋ nan nikpera kur dɔɔ sɔnjot ni ki kpowa,
ki datai jukbanjai na kpii naasimm nan sapaamm;
ki a kpiib, ki ki mɔk ninbatinu namm,
daar nba ki a wutoor doo na ni.
22 A yiin n datai ki bi lintin,
ki tee nan baa tuu yiin jaamm dinu na,
ki sɔɔ kaa ki saa fit chiar paak, a wutoor daar na ni.
Bi kpii n waas nba ki n wubirib ki loomm nawa.