1 Yennu, ii tian linba teenit na po. Gotirit, ki la ti fei.

2 Ti mɔkint na be boorganu nuu nie;

ki boorganu niib ji kɔɔ ti ŋei ni.

3 Datai na kpii ti baanbawa, ki ti naanba ji tee pakɔi mɔtana.

4 See ki ti pa nyun nba ki ti nyu na paak;

see ki ti daa daat nba ki ti sii jokit muu.

5 Ki bi diat nan paŋ nan ti tee bonii koo laagumiinba na;

ki ti tan bak, ŋaan ki bi ki sak ti foi.

6 Ki ti ji ti mɔŋ tur Ijipt teeb nan Asiria teeb,

a lin te ki tii laat jeet, kii mɔk manfoor.

7 Ti yeejamme din tun biir, ŋaan bi ji kaa mɔtana,

ki timme ji di wahala, biit nba ki bi tun na paak.

8 Ki niib diat, ŋaan niib maŋ ki chee yommii,

ki sɔɔ kaa ki saa fatit ki tin nyi bi nuu ni.

9 Nikpiirit line doo na kur po.

Ti tuu chibin ti saaŋmaniie, yoo nba ki ti kpaan jeet.

10 Kon te ki ti gbanant toŋ,

ki tee nan boroboro diiuk nba tuu toŋ biaŋinba na.

11 Bi fat ti poob ki dɔɔ namm, Sayɔnn kunkonn tiɔŋ paake;

ki Juda digbanbis kur ni, ki bi mukis ti bonpoi, ki dɔɔ namm,

12 ki soor ti tɔɔndamm ki jɔnnib, ki ki teen nikpera na chɔruŋu,

13 ki mukis ti naasimm na, ki bi naan dii,

ki li tee nan bi tee daabae na,

ki bonjabis na lin jikin dakpiata nba gar bi paŋ terik.

14 Ki nikpera na ji ki kaar doo na tammɔkɔɔka boori;

ki nipaauŋ na mun bia ji ki yiin yanii ki faa bonfifaati.

15 Parpeenn nyii ti binbeŋ niwa,

ki parbiir gaar ti sawaanu yiar.

16 Taa tuu mɔk parbifaant linba paak na, li siar ji ki biari.

Ti tun yanbɔmma, ki mɔtana ti ji be biiru nie.

17 Ti para biir bonchiann,

18 kimaan Sayɔnn kunkonn*5.18 Sayɔnn kunkonn tee siaminba ki Yenjiantu ŋasaakak be nae. dɔɔ yanne,

ki sɔɔ kaa li ni, ki mɔbɔi ji lin li langbent ni.

19 Yennu, fine tee kpanbar nba sii yɔɔ be,

ki sii diat nan durinya na gbennu.

20 Bee teen ki a nyikit ki li wei nna? A saa ban tiar ti po jika-a?

21 Yennu, a te ki tin jen a boor. A te ki tin jen.

A ŋamm fiin ti sann nba din be yaayoo niwa na,

22 koo a kpan yêtite nan yoo nba kaa gbennu-u?

A wutoor kpan yɔɔ be-e?