23
1 Ki Balam yet kpanbar Balak a, “Maan maruŋ binbinta ŋanlore nna ki turin, ki bia baar nan naajai banlore nan pejai banlore.”
2 Ki kpanbar Balak tun nan biaŋinba ki u wannɔ na, ki ŋɔɔ nan Balam jii naajak nan pejak ki mann maruŋ, binbintir kur paak. 3 Ki Balam yet kpanbar Balak a, “Ii see nna kii kpia a mujoonu Yenpiinii, ŋaan ki n saan ki laan Yennu saa chetimi. Linba kur ki u fiit ki wannin, n saa betawa,” ŋaan saan u kuukɔɔ ki doo jɔɔr na yur paak. 4 Ki Yennu chetɔ. Ki Balam yet a, “N maa maruŋ binbinta ŋanlore nawa, ki mann naajak nan pejak, binbintir kur paak.”
5 Ki Yennu wann Balam waa saa pak linba, ki te ki u ŋmat kpanbar Balak boor, a wun saa turɔ u mɔmaan. 6 Ki u ŋmat ki saa la Balak nan Moab saakab, ki bi see kpia u mujoonu Yenpiinii na.
7 Ki Balam ji yet masɔkinkara na a:
“Balak, wunba tee Moab kpanbar nae nyii nanin Siria yent ni,
ki li be yondo po kunkona paak, ki yet a,
‘Baat ki tan pak turin.
Satir mɔtont ki teen Israel teeb paak.’
8 Nlee ki n saa sat mɔtont ki teen binba paak
ki Yennu ki sat mɔtonti,
koo ki pak biir binba ki Yennu ki biiri?
9 N be tanpigbent na paak ki laatib;
n be jɔkunkonn na paak ki bariib.
Bi tee digbann nba kɔɔ bi kuukɔɔe;
bi mi nan piisin be bi paak, ki chee digbanlia.
10 Israel maaru na tee nan tanbiinii nae,
bi yab ki kaa kanni.
Ŋaant ki n tan joont nan Yennu niib na;
ŋaant ki min kpo nan parmaasir nan niŋamm na.”
11 Ki kpanbar Balak yet Balam a, “A tun bee na ki turimi? N jiia ki baar nana nna, maa a sat mɔtont ki teen n datai paak, ki a ki tun nna, ŋaan sat piisin ki teen bi paak.”
12 Ki Balam jiin a, “N daa piak linba ki Yennu wukin n mɔb ni-i?”
Ki jiin Balam masɔkinkar munlee po
13 Tɔn, ki kpanbar Balak yet Balam a, “Ii waa ki tin saan siaminba ki a saa fit la Israel teeb na siabe, ki a set leŋ ŋaan sat mɔtont bi paak ki turin.” 14 Ki u jii Balam ki saan nanɔ Sofim muuk ni, ki li be Pisga kunkonn paak. Leŋ maŋ ki u maa maruŋ binbinta ŋanlore, ki jii naajak nan pejak, ki mann maruŋ binbintir kur paak.
15 Ki Balam yet kpanbar Balak a, “Ii see nna, kii kpia a mujoonu Yenpiinii, ŋaan ki n saan ki chet Yennu nna po.”
16 Ki Yennu chet Balam, ki wukinɔ linba ki u saa yet, ki te ki u ŋmat kpanbar Balak boor a wun saa turɔ u mɔmaan. 17 Ki u ŋmat ki saa la Balak nan Moab teeb saakab, ki bi daa see kpia u mujoonu Yenpiinii na; ki Balak boiɔ linba ki Yennu wannɔ. 18 Ki Balam yet masɔkinkar na a:
“Baat na, Balak, fin nba tee Sipor bija,
ki tan gbiint linba ki n yaa man paka.
19 Yennu ki tee nan nirɔ na kaa, ki saa faar faaki,
koo ki tee nan nisaarik bik na, ki saa lebit u dudukiti.
Linba kur ki u senn mɔsonn, u tuu tume. U yeen, ki li tuun.
20 Yennu wannin a man sat piisin,
ki wunba Yennu teen piisin u paak, n kan fit lebiti.
21 N laat ki ninbɔnsiar kan baar Israel maaru paak,
ki bi kan di fara. Bi Yomdaanɔ Yennu be namm,
ki bi mɔɔntir ki yaa ŋɔɔe tee bi kpanbar.
22 Yennu-e nyinnib Ijipt,
ki kɔn bi paak nan mɔnaab nba tuu kɔn na.
23 Jabaabusiar ki be ki saa fit biir Israel maaru,
koo nyɔksiar ki be ki saa fit biir Israel teeb maŋ.
Ki niib tan saa yet a,
‘Gotir linba ki Yennu tun ki somm Israel teeb.’
24 Israel teeb tee nan yanbɔr nba mɔk paŋ,
ki ki foi see ki u tan pat pat, ki dii,
ki bia nyuu linba kur ki u kpii na sɔn nae.”
25 Ki kpanbar Balak yet Balam a, “A yêt nan fin sat mɔtont ki teen Israel teeb paaka, ŋaan a mun daa sat piisin ki teenib.”
26 Ki Balam jiin a, “N ki beta nan see ki n yet linba kur ki Yennu wannimi-i?”
Ki jiin Balam masɔkinkar muntaa po
27 Ki kpanbar Balak yet Balam a, “Ii waa ki tin saan leer po. Li pasiar leŋ ŋarin, Yennu sii loon ki a sat mɔtont bi paak ki turin.” 28 Ki kpanbar Balak jii Balam ki saan nanɔ Peor jɔɔr paak, siaminba ki bi laat kunkoouk na. 29 Ki Balam yet kpanbar Balak a, “Maan maruŋ binbinta ŋanlore nna ki turin, ki bia baar nan naajai banlore nan pejai banlore.” 30 Ki kpanbar Balak tun nan Balam nba wannɔ biaŋinba na, ki mann naajak nan pejak maruŋ binbintir kur paak.