24
1 Yoo nba na ki Balam ji bann nan Yennu loon wun teen piisin Israel teeb paake, li paak ki u ji ki boi jabaabunu po nan sinsinn yara na. Ki u ŋmant u numm ki tokin kunkoouk na po, 2 ki la Israel teeb, ki bi kar kaaŋ na ni booru booru. Ki Yennu Seek sik u paak, ki u sɔkin Yennu maan, 3 ki yet a:
“Balam, wunba tee Beor bija na masɔkinkare na,
mɔmaan na tee jɔɔ nba ki u ninbina laat fanu na yare,
4 ki tee daanɔ nba gbia Yennu mɔmaan na masɔkinkar,
daanɔ nba laat Yabint Yennu yirintu,
ki tee daanɔ nba tuu baa ki faab tiŋ ni,
ŋaan ki u ninbina nyɔɔn.
5 Israel teeb lanbont ŋan bonchiann, ki tee bi binbeboor,
6 ki lat tee nan baat na,
ki tee nan kpabis nba kpia mɔkir na,
ki tee nan tebuk tutuuk nba ki Yennu burɔ na,
ki tee nan kpek nba see kpia nyun na.
7 Ki bi saa la saak bonchiann,
ki saa bur bi bonbuburit siaminba kur mɔk maatuk,
ki bi kpanbar sii mɔk yiikoo ki gar Agag,
ki bi yent sii yarin ki bia fɔk.
8 Yennu-e nyinnib Ijipt,
ki kɔn bi paak nan mɔnaab nba tuu kɔnna,
ki bi tuu kɔn nyann bi datai, ki jintir bi kpaba buri buri,
ki jikit bi peenii ki yekitib.
9 Ki Israel booru maŋ tee nan yanbɔr wɔkituk na,
ki li-i tee ki u gɔɔnti, sɔɔ ki mɔk par nba saa fiinɔ.
Wunba sat piisin Israel teeb paak mun saa gaar piisin,
ki wunba mun sat mɔtont Israel teeb paak mun saa gaar mɔtont.”
10 Ki kpanbar Balak ŋmaan u nii nan wutoor, Balam paak, ki yet a, “N yiina maa a tan sat mɔtont n datai paak, ŋaan taar muntaa na, a sat piisime bi paak. 11 Fiit mɔtana kii kun. N bo yet nan n saa pa paatii ki tura, ŋaan Yennu bera ki a kan gaar paatii maŋi.”
12 Ki Balam yetɔ a, “N bo bet toomii nba ki a tumm n boor ni na nan 13 li-i lekii tee ki Balak saa turin lik-kut nan salimmɔna nba be u ŋaak ni kur, ŋaan n kan yêt Yennu mɔb ki tun n mɔŋ nba loon biaŋinba, n saa pak linba ki Yennu turin kɔɔe.”
Balam masɔkinu munna ni
14 Ki Balam yet kpanbar Balak a, “Mɔtana, n ŋmat n niib boore na. Ŋaant ki n kumiia linba ki Israel teeb saa tun ki tur a niib, yoo nba baat.” 15 Ki Balam ji yeen masɔkinkar na a:
“Min nba tee Beor bija na masɔkinkare na,
mɔmaan na tee jɔɔ nba ki u ninbina laat fanu na yare,
16 daanɔ nba gbia Yennu mɔmaan na masɔkinkare na,
ki tee daanɔ nba ki u bannu nyi Yabint Yennu boor,
ki tee daanɔ nba laat Yabint Yennu yirintu,
ki tee daanɔ nba tuu baa ki faab tiŋ ni, ŋaan ki u ninbina nyɔɔn.
17 N gorii yoo nba baat,
ki laat Israel teeb kpanbar nba tee nan ŋmaajar na,
ki nyi niib na ni.
Dammir saa nyi Israel teeb ni;
ki u saa yakit Moab saakab yura, ki faa bir Sef niib kur.
18 U saa kɔn nyann u datai, Edom tiŋ ni,
ki jii bi tiŋ ki lin kpant u faar,
ki Israel teeb sii yɔɔ mɔk paŋ.
19 Israel niib saa biirib,
ki boont binba biar be bi manfoor ni, doo maŋ ni na.”
20 Balam yirintu ni ki u la Amalek teeb, ki yet masɔkinkar na a:
“Amalek teebe din mɔk paŋ ki gar sɔɔ kur,
ŋaan bi tan saa boont, ki ji kan ban fiiri.”
21 U yirintu maŋ ni ki u la Kenn teeb, ki yet masɔkinkar na a:
“A binbeboor na ŋan,
ki li bɔr nan nɔɔŋ tiɔk nba be tanfiiɔk ni na,
22 ŋaan yimm Kenn teeb, i saa boonta,
yoo nba ki Asiria teeb tan saa soori na.”
23 Ki Balam ŋamm yet masɔkinkar na a:
“Ŋmee saa tinni, li-i tee ki Yennu lor linba na?
24 Fat-teeb saa nyi Kitim ki baar nan burgbeta;
bi saa kɔn nyann Asiria nan Eber tinii,
ŋaan bi mɔŋ tan saa boonte ki kpakin yann.”
25 Tɔn, ki Balam fiir ki ŋmat kun u doo ni, ki kpanbar Balak mun gaar u sɔnu.