4
Daajoouk Yenmiaru ki jiin sommir po
1 Yennu, fin nba tee n fat-tɔɔ,
turimin gatu yoo nba ki n fabin tura.
Maa bo be daamii ni, fine bo sommin.
Ii tee burchimɔ n boor mɔtana, ki gbiint n miaru.
2 Yimm niib na, taar munŋaae ki i sii dintin fei?
Taar munŋaae ki i sii loon linba kaa nyɔɔti,
ki bia waa linba ki tee barmɔnii?
3 Bant nan Yennu gann niŋamm nae ki teemm u yab.
U gbiintir n fabinii, yoo nba ki n yiinɔ.
4 Ii jekir nan yanputuk ki nyik toonbiit man.
Ii tuu kii dɔɔ i dɔɔnii paak soon nna,
yin dukin linba na fanuwa.
5 Mant maruŋ nba took ki tur Yennu,
ŋaan teenɔ yada.
6 Niib bonchiann fabin ki yeen a,
“Yennu, teent piisin ti paak.
Ii mɔk ninbatinu nan timm.”
7 Ŋaan faa turin parpeenn nba na chee bi dii
nan bi tilɔɔna daan nba saa turib linba.
8 Mi-i dɔɔr, n tuu gɔɔn n yamanie,
kimaan fin Yennu kɔɔe guun ki dian fanu.