1 Gbiintir n mɔmaan ki gbat n duna,

2 gbiintir n mɔnii ki sommin,

fin nba tee n Yennu nan n kpanbar.

N meia, Yennu.

3 Fine gbia n kunkɔr sanyiɔk ni,

ki yondoor ki n tuu fabin nana, ŋaan ji guu a gatu.

4 A tee Yennu nba ki loon biite.

A ki saak biit a boor ni.

5 A poŋ ki loon fan la dont-n-mɔŋ damm.

A ki loon binba tee nɔɔntont damm na maami.

6 A tuu biir faak damm nae,

ki bia yisin kpikpiruk nan kpinkpannii damm.

7 Ŋaan a yaa lonchiɔŋ paak ki n fit baat a boor.

N fit jiantira, a kasii ŋasaakak ni,

ki bia gbaant a tɔɔnn ki teena baakir.

8 Yennu, n datai yab bonchiann.

Sommitin ki man tun a loomm.

Ŋammit a sɔnu fanu ki man tɔkin.

9 N datai nba piak linba kur ki tee barmɔnii.

Ŋamm kpan loon bin biire.

Bi mɔmaan kur mariie,

10 Yennu, datir bi tuba ki biirib.

Ŋaant ki bi tiɔŋ lorbiit na n biirib.

Berimm a boor ni, kimaan bi toonbiit kaa bannu,

nan bi mɔyêtuk nba ki bi mɔk ki jiin a po na paak.

11 Ŋaan binba kur teena yada na be nan parpeenn,

ki saa fit yin parpeenn yanii.

Ii guu daansiab nba loona na,

12 Yennu, a teen daansiab nba saak a mɔb nae piisin,

ki a lomm tee nan naagbankɔŋir na ki nyintib daŋ ni.