7
Yenmiaru nba jiin fatu po
1 N Yomdaanɔ Yennu, n baar a boor a fii nyintin bonbiir nie;
a nyinnin binba waa beerin na nuu ni.
2 Nna-i kaa, bi saa bibin nan yanbɔr nae,
ki saan nanin siaminba ki sɔɔ kaa ki saa gaarin,
leŋewa ki bi saa pat n gbanant yɔni yɔni.
3-4 N Yomdaanɔ Yennu, li-i tee ki n tun ki biir sɔɔ,
li-i tee ki n nyii n yɔsiak poor,
koo ki n ki mɔk ninbatinu nan daansɔɔ nba biirin,
li-i tee ki n tun linba na yenn,
5 fan ŋaan ki n datai maŋ n wein ki soorin;
ŋaant bin nyannin ki kpin, ki n gbanant-ii dɔɔ
ki daa mɔk manfoori.
6 Yennu, fiit nan wutoor,
setir a taajaa paak, ki took n datai bi wutoor ni,
ki sommin, kimaan a tee wunba waa barmɔnii sɔnue.
7 Tikit niib na kur a boor ni, kii diab.
8 Yennu, fine tee nisaarii kur barbuurɔ,
a bu ki sommin; a mi nan n ki mɔk biiti.
9 A tee popeenn Yennu-e,
ki bu ti para ni nan ti dudukit ni buut.
Potir nɔɔntont damm binbeŋ na,
ŋaan tur niŋamm na nyɔɔt.
10 Yennu-e nyintin ninbɔŋ ni,
u tint daansiab nba saak u mɔb.
11 Yennu tee popeenn barbuurɔe; u tuu biir nibiit nae.
12 Bi-i kii lebit bi binbeŋ, Yennu saa ŋat u jukbanjiak nae.
U daar u tɔrbanne ki tee siir.
13 U jikit u jatiat nba kpi kuun nae;
u yekit u peenii nba mɔk muu nae.
14 Gotir nibiit na nba dukii biit po,
bi lorin kpikpiruko ki dukii kpinkpannii.
15 Ŋaan baa pii barit nba na, bi mɔŋe bia siik leŋ.
16 Bi tubdatu nyi bi tiɔŋ toonbiit nie;
bi danii nyi bi tiɔŋ kpikpiruk nie.
17 N teen Yennu niipoouk, u ŋamm paak.
N yiin yaŋ ki dont Yennu, wunba tee Yabint Daanɔ na.