20
Yenmiaru nba jiin nyannu po
1 Yennu n gat a miaru, yoo nba ki a be daamii ni.
Ŋɔɔ nba tee Jakɔb Yennu na-ii guua,
2 ki tura sommir, ki lin nyi u ŋasaakak ni,
Sayɔnn kunkonn na paak.
3 Wun gaar a maruŋ kur nan a mujoonu piinii kur,
4 ki tura faa loon linba kur,
ki ŋmakit a bont kur, ki fan la nyannu,
5 ki ti tan saa yikin nan parpeenn, yoo nba ki a la nyannu na,
ki ti saa donn ti farimii ki dont Yennu.
Yennu n gat a miaru kur.
6 Mɔtana, n ji bann nan Yennu tint u niganntɔɔ,
ki teenɔ gatu, ki tee ki u niganntɔɔ na laat nyannu.
7 Nisiab teen yada nan bi taantorite,
ki leeb mun teen yada nan bi taanii,
ŋaan timm ŋarin teen yada nan ti Yomdaanɔ Yennu sanne.
8 Li nibooru sii gbiatire, ki baa,
ŋaan ki timm n fiir, ki see kenken.
9 Yennu, turin a kpanbar nyannu.
Gbiintir, ki turit gatu yoo nba ki ti yiina.