28
Yenmiaru nba jiin sommir po
1 Yennu, fine tee n sommtɔɔ, ki n yia.
A daa nyar a tuba nanimi.
Li-i tee ki a ŋmin ki ki turin gatu,
n sii tee nan binba sik kpeentiŋ nae.
2 Gbiintir ki turin, yoo nba ki n fabin ki loon sommir,
yoo nba ki n donn n nii ki jiin a kasii ŋasaakak po.
3 A daa biirin ki kpab nan nɔɔnbiit damm nba tee
toonbiit dammi, binba piak kunkɔmana ki teen leeb,
ŋaan mɔk nɔɔn ŋmiant na.
4 Datir bi tuba toonbiit nba ki bi tun,
nan yanbɔntoona nba ki bi tun na paak.
Datir bi tuba ki pab biit nba ki bi nii tun paak,
ki jiin turib linba kpaab.
5 Bi ki diitir ki bant linba ki Yennu tun nan linba ki u nami,
li paak ki u saa dat bi tuba, ki boontib, ki bi ji sii kaa.
6 Dontir tee Yennu yare,
kimaan u gbat n fabinii ki tinin ninbaauka.
7 Yennu-e tee n guutɔɔ ki kɔn n paak.
N teenɔ yada, ki u sommitin, ki n mɔk parpeenn,
ki saa yin kpinkpammuk yaŋ, ki turɔ niipoouk.
8 Yennu-e guu u niib,
ki kɔn u niganntɔɔ paak, ki teenɔ tinnu.
9 Yennu, tint a niib, ki teen piisin bi paak,
kii kpaarib nan yoo nba kaa paak.