29
Ki jiin Yennu kunkɔr nba nyii wonpaaruk ni po
1 Pakin Yennu man, yendɔuŋ ni naamii,
pakin Yennu, u baakir nan u paŋ paak.
2 Pakin Yennu, u baakir sann paak.
Gbaant man tiŋ ni ki jiant Kasii Daanɔ,
wuu taŋi lekit yoo nba.
3 Yennu kunkɔr toon mɔkgbeŋa paak;
ki tee baakir Yennu tintantii.
Yennu tintantii be mɔkgbeŋa paak.
4 Yennu kunkɔr mɔk paŋ bonchiann.
Yennu kunkɔr mɔk yabint baakir.
5 Yennu kunkɔr yakitir kpekii.
Yennu kunkɔr yakitir Lebanonn kpekii buri buri,
6 ki te Lebanonn jɔjaana mobit nan naabis na,
ki bia te Hermonn kunkonn yuk nan naajagann na.
7 Yennu kunkɔr tantir, ki saak nyikintir.
8 Yennu kunkɔr te ki kunkoouk damm.
Yennu kunkɔr damm Kades kunkoouk.
9 Yennu kunkɔr kɔnii naajii,
ki suur tutuut nba be tiinii maŋ paak,
ŋaan ki binba be Yennu ŋasaakak ni na yikin a,
“Baakir tee Yennu yare.”
10 Yennu mɔk yiikoo mɔkgbeŋa na paak.
Yennu-e tee kpanbar mɔkmɔk nan mɔkmɔk.
11 Yennu jikit paŋ ki teen u niib;
Yennu tee piisin u niib paak, ki teemm parmaasir.