31
Yenmiaru nba jiin yada teenu po
1 Yennu, n baar a boor ki loon sommire,
a daa te ki sɔɔ nyantin.
Nyintin, kimaan a tee kasii daanɔe. N meia, fatirin.
2 Gbatir ki turin. Sommitin mɔtana.
Ii tee n guutɔɔ ki fatin, kii leekin ki tinnin.
3 Fine tee n sommtɔɔ nan n tinntɔɔ,
ki a sii dian ki ŋmakitirin, a sanŋann paak.
4 A nyinnin baruk nba ki bi pii ki guunin na ni,
kimaan fine tee n sommtɔɔ.
5 N jikit n seek ki kubint a nuu ni,
Yennu, barmɔnii Yennu, a tinnin.
6 A ki loon binba jiantir tingbana na.
Fine ki n teena yada.
7 N sii mɔk parpeenn, ki kpamm,
kimaan a mɔk lomm yoo kur,
ki laat ki bia mi n daamii nba tee.
8 A ki te ki n datai nyannimi,
ki te ki n la woruku ki saa fit saan maa loon siaminba.
9 Yennu, tinimin ninbaauk, kimaan n be wahala nie.
N ninbina bak nan mɔniiwa, ki n mun bia chɔka;
10 ninbaatir chɔkima, ki mɔnii jiŋ n manfoor,
ki n daamii kur te ki n bak, ki n kpaba baŋ.
11 Ki n datai kur, mantik n leeb na, dian diabiike.
Binba min fanu, ki bi tiinin jaŋmaanii,
bi-i lan sɔnu ni, bin chiar.
12 Ki sɔɔ kur tamm n po, nan n kpoe na;
ki n ji tee nan baa tuu jii bont nba biir ki lu na.
13 Ki n gbia ki n datai burin ki biirin lokir kur po,
ki kɔɔntin jaŋmaanii, ki lorin lora n paak, a bin kpin.
14 Yennu, fine ki n teena yada,
ki yet a, “Fine tee n Yomdaanɔ.”
15 N sii yɔɔ be a nuu ni, ki a fatin n datai boor,
ki bia fatin binba waan a bin biirin na boor.
16 Ŋaant ki a ŋant-ii be min, a toontunnɔ paak.
A jii a lomm nba be yoo kur na ki tinnin.
17 Yennu, a daa te ki n di fei,
kimaan n fabin ki turawa.
Ŋaant ki nɔɔnbiit damm n di fei,
ki sik dɔɔr soon nna kaauk ni.
18 A te ki bi fai mɔi na n kpakin,
binba tee fai damm nan biir teeb,
ki piak biir niŋamm na kur.
19 A ŋant yab bonchiann ki a jii guun binba baakita.
Sɔɔ kur mi faa ŋan biaŋinba, ki a guu binba teena yada,
20 ki nyintib bi datai lora ni, ki bɔriib a boor ni,
ki bi nyi bi datai sukit ni.
21 Pakin Yennu, kimaan u tun u lomm nba kaa paak nae
ki turin, yoo nba ki n datai bo lekin ki n be bi sinsuuk ni na.
22 Jaŋmaanii bo soorime, ki n yet a,
“Yennu-e berin, ki n fɔkit nanɔ.”
Ŋaan ki u gbat n fabinii, yoo nba ki n yiin ki loon sommir na.
23 Ii loon Yennu man, yimm nba tee u niib na.
Yennu maŋe guu niŋamm,
ŋaan daar karinbaandamm tuba nan laa kpaab biaŋinba na.
24 Ii wakii man, ki chee i para,
yimm nba mɔk dindann nan Yennu na.