GBOUŊ ŊANLEE
42
(Yanii 42 -- 72)
Ki jiin wunba be digbangann Yenmiaru po
1 Yennu, n lin kpaana nan n par kur
nan piarɔ nba tuu lin kpaan nyunmaasin biaŋinba nae.
2 Fin Yennu nba fo na, n niana.
Nlee yooe ki n sii be a tɔɔnn ki jiantirani?
3 Yonnu ni nan nyiɔk kur ki n mɔ ki ninnyuut tee n jeet.
Ki n datai yɔɔ ki boin a, “A Yennu na be lia?”
4 Mi-i tiar linba gar, n yan tuu yêt bonchiann,
ŋanne tee maa tuu lakin saan nan nibur Yennu ŋasaakak ni na.
Ki n tuu ŋmakitir nibur maŋ, ki bi somm nan parpeenn,
ki yiin yanii ki dontir Yennu nan kunkɔpaara.
5 Bee ki n be parbiir ni? Bee ki daamii be n ni?
N saa teen n dindann Yennu nie, ki saa ŋamm dontɔ,
Ŋɔɔe tee n tinntɔɔ nan n Yennu.
6 N be parbiir nie, li paak,
mi-i dukin Jɔɔdann mɔkir po, n tuu tiar a poe,
mi-i dukin Hermonn kunkonn po, n tuu tiar a poe,
mi-i bia kii dukin Misar kunkonn po, man tiar a po.
7 Sutik yi sutik nan fuur, ki pir n paak nan nyunmɔnn na,
ki tee nan nyunpana nba tuu lakitir na, ki pir piinin.
8 Yennu want u lomm yonnu ni,
ki n fit yiin yaŋ nyiɔk ki teenɔ,
ki miar ŋɔɔ Yennu nba teenin manfoor na.
9 N yet Yennu, wunba tee n guutɔɔ na a,
“Bee ki a tamm n po? Bee ki n sii lin di fara,
ki n datai dia ki ŋmaŋitimi?”
10 Ki bi chɔɔn n kpaba nan sukit, ki boin daa kur a,
“A Yennu na be lia?”
11 Bee ki n be parbiir ni? Bee ki daamii be n ni?
N saa teen n dindann Yennu nie, ki saa ŋamm dontɔ,
ŋɔɔe tee n tinntɔɔ nan n Yennu.