48
Ki jiin Yennu digbanjaann Sayɔnn po
1 Yennu tee yabint daanɔe,
ki ŋan tin dontɔ, u doo nba be u kasii kunkonn paak na ni.
2 Sayɔnn tee Yennu kunkonne, li fɔk ki bia ŋan;
kpanbar jaann nba tee Yennu na,
u dooe tee durinya kur parpeenn boor.
3 Yennu be doo maŋ ni, ki wann nan yamani benu be u boor.
4 Ki kpanbara taan leeb ki baar
a bin kɔn nan Sayɔnn kunkonn doo na.
5 Baa la doo maŋ, ki li yaar litib, ki jaŋmaanii soorib, ki bi chiar,
6 ki ji jekir nan poo nba tuu mɔ matyiaru na,
7 ki lian nan wonpaaruk nba tuu tut ŋaringbeŋa
ki li lian biaŋinba na.
8 Ti gbat ki bia la linba ki yabint daanɔ Yennu tun
doo maŋ niwa.
U sii guu doo maŋ, ki li be li yamani,
nan yoo nba kaa paak.
9 Yennu, a ŋasaakak niŋe,
ki ti dukii a lomm nba kaa gbennu na po,
10 ki niib kur dontir a sann durinya kur po,
ki a dia a doo nan barmɔnii.
11 Ŋaant ki Sayɔnn niib-ii mɔk parpeenn,
ŋaant ki parpeenn-ii be Juda doo ni,
kimaan a buut ŋan.
12 Yennu niib, ii somm lint Sayɔnn, ki kan li difoot.
13 Gotir li joona, ki fiitir li maarpaara fanu,
ki tan fit wann maarpaanu nba waa na a,
14 “Yennu na tee ti Yennu-e mɔkmɔk nan mɔkmɔk,
ki sii tee ti ŋmakit-tɔɔ nan durinya gbennu.”