49
Fi-i teen mɔkint yada, li tee jatiie
1 Sɔɔ kur n gbat na man,
gbiintir, niib nba kur be tingbouŋ na paak,
2 li nijaana nan tarii, li mɔkita nan nandamm kur.
3 N dudukit be paanu ni, ki n saa pak yanfoon maan.
4 Ki n saa ŋmat got barjokit ni,
ki faa biɔk ki yin yaŋ ki wann li paak.
5 Li-i tee ki n datai lintin ki n be ninbɔŋ ni,
n ki tiin jaŋmaanii.
6 Bi tee binba teen bi mɔkint yada,
ki bia dont bi mɔŋ, bi likirii paake.
7 Nisaarik kan fit tinn u mɔŋ,
u kan fit pa Yennu, u daauk nba tee biaŋinba,
ki li tee u manfoor paaki,
8 kimaan nisaarik manfoor paak pann yab bonchiann.
U lekii pa linba, ŋaan li kan jaŋ
9 nan u ji daa kpenn ki siik kaauk ni.
10 Sɔɔ kur saa la nan yandamm kpenn,
ki jatit kpenn, ki bonliinii bia kpenn.
Bi kur tuu nyik bi mɔkinte ki tur siab.
11 Bi kaat saa teen bi ŋei nan yoo nba kaa paak,
ki bi sii be leŋ yoo n tuu yoo,
ŋaan bo mɔk bi yur paak tiniie.
12 Nisaarik mɔkint kan fit nyinnɔ kuun ni,
u bia lek saa kpoe nan bonkobuk nba kpenn na.
13 Gotir linba tuun ki teen damm nba teen bi mɔŋ yada,
nan bi leeb nba saak baa piak linba na.
14 Bi saa kpoe nan pei nba kpenn na,
ki kuun sii tee bi kpaartɔɔ.
Binba be kasii na saa nyannib,
ki bi gbanant saa bat yian kpeentiŋ, siaminba fɔk nan bi ŋei.
15 Ŋaan Yennu saa fatin kuun nuu ni,
ki saa jiin, ki mii be u boor.
16 Li-i te ki a la ki nirɔ mɔkitir,
koo u mɔkint maŋ yabitiri, a daa te ki li daamiia.
17 U tan kan fit jii ki saan nann yoo nba ki u kpenni,
u mɔkint na tan kan weiɔ ki saan kaauk ni.
18 Nirɔ numm-i lekii gboo waa mɔk linba,
ki niib kpakitirɔ, u mɔkint na paaki,
19 u lek tan saa kpoe ki wei u yeejamm,
ki kan ban la yentu.
20 Nisaarik-i mɔk mɔkint ŋaan ki mɔk bannu,
u bia lek saa kpoe nan bonkobuk nba kpenn na.