51
Yenmiaru nba jiin nyikin chab po
1 Yennu, tinimin ninbaauk,
kimaan a lomm nba yɔɔ be na paak.
A wuur n yanbɔmm nan biit kur,
kimaan a ninbatinchiɔŋ na paak.
2 Wuutin fanu, ki man nyi yanbɔmm nan biit kur ni.
3 N bann nan n be yanbɔmm nan biit nie yoo kur.
4 N tun ki biirawa, n biir fin kuukɔɔe,
ki tun linba ki a yaa li tee bonbiir na ki tura.
Li paak, a mɔk mɔnii nan fan bu n buut.
N kan nyiira, li-i tee ki a biirin.
5 N din tee yanbɔndaanɔe yoo nba ki bi marin na,
ki bia tee biit daanɔ yoo nba ki bi din soor n poor nawa.
6 A kpaan mamɔmm nan barmɔniie nisaarik ni.
Kɔɔnt a bannu n dudukit ni.
7 Nyint n yanbɔmm ki mii yeen,
a wuurin ki mii peen nan sakaana na.
8 Ŋaant ki man gbat parpeenn nan parmaasir fuur,
faa lek kɔnn n kpabawa na, ŋaan n bia sii mɔk parpeenn.
9 Bɔrin a numm ki daa laat n yanbɔmmi,
ŋaan wuur n biit kur.
10 Yennu, ŋammit n par ki lii ŋan,
ki pant n seek nan binbenŋaŋ.
11 A daa beer ki nyintin a boor,
koo ki nyinn a Seyeeŋ na n ni.
12 A ŋamm turin a tinnu kpinkpammuk na,
ki te ki mii loon a mɔsaku.
13 Ki n saa wann yanbɔndamm a sennii,
ki bi saa jen a boor.
14 Yennu, nyikin n manfoor ki tinnin,
ki n saa jii parpeenn ki mɔɔnt a kasii binbeŋ.
15 Yennu, lootir n mɔb, ki man pak dont a sann.
16 A ki loon maruŋ, nna-i kaa, n bo saa jiie ki tura.
A baka bia kaa mujoonu piinii ni.
17 Yennu, n maruŋ tee sikin-n-mɔŋ binbeŋe.
Ki a kan yêt daanɔ nba sikin u mɔŋ ki lebit u pari.
18 Yennu, tinin Sayɔnn doo ninbaauk ki sommir,
ŋammit maa Jerusalem joona.
19 Ki li saa te ki a mɔk parpeenn nan maruŋ nba ŋan,
nan mujoonu piinii,
ki bi sii kpi naajai ki mann maruŋ, a binbintir na paak.