52
Yennu buut nan u ninbatinu
1 Bee ki a dont a mɔŋ nan toonbiiti, fin nijaann na?
Yennu lomm be-e mɔkmɔk nan mɔkmɔk.* 52.1 Koo “Bee ki a dont a mɔŋ daa kur ki saa di fei Yennu boori?”
2 A lorin a fan biir leeb, ki a mɔb di nan bilepaann na,
ki a fa fai,
3 ki loon bonbiir ki gar bonŋann, ki loon faak ki gar barmɔnii,
4 ki loon faak nba saa pak ki biir a leeb, faak daanɔ na.
5 Barmɔnii, Yennu saa biirae fas fas;
u saa soorae ki dat nyinna a ŋaak ni;
u saa nyinna nisaarii tiŋ na ni,
6 ki niŋamm saa la linba na ki tin jaŋmaanii,
ki bi saa laa laat ki yet a,
7 “Gotir, jɔɔ nba nae ki jii u mɔŋ tur Yennu,
ŋaan maa u mɔkint paak, ki dukii nan nɔɔnbiite saa sommɔ.”
8 Min ŋarin tee nan kpan tiik nae, ki see Yennu ŋasaakak ni.
N yada yɔɔ be u lomm nba be mɔkmɔk nan mɔkmɔk na nie.
9 Yennu, n sii tun ki teena niipoouko,
faa tun linba ki turin na paak,
a sann nie ki n mɔk dindann, kimaan a sann ŋan,
ki n saa dont a sann maŋ, a niib tɔɔnn.