65
Ki jiin dontir nan niipoturu po
1 Yennu, li ŋan ki tin dont a sann Sayɔnn doo ni.
Fine ki ti saa jii ti mɔsona ki tura,
2 kimaan fine gat miaru,
ki niib nba be lokir kur po saa baar a boor.
3 Taa bo be yanbɔmm ni na, ki a bo nyik chab ti biit.
4 Damm nba ki a gannib na, parpeenn tee bi yare;
ŋamme tee binba ki a baar namm a bii be a kasii boor na,
ki ti saa gboo nan bonŋana nba be a ŋaak ni na,
ki tee piisin nba be a kasii ŋasaakak ni na.
5 Yennu nba tee ti tinntɔɔ, a teent gatu,
a bakitnauŋ toonŋana ni,
Niib nba be durinya kur po,
nan binba be mɔkgbeŋa pootir, banfɔkira na,
bi kur maa a paake.
6 Fine bir jɔjaana nan a paŋ,
ki wann a yabint paŋ nba tee biaŋinba.
7 Mɔka nyunpana nba fi biaŋinba, ŋaan fine te ki li baŋit,
ki fit so nyunpana fuur;
ki niib-i tɔɔ jat paak, fine fit sikint bi wutoa.
8 Durinya niib kur mɔk jaŋmaanii,
toongbeŋa nba ki a tun na paak,
ki toona nba ki a tun na te parpeenn fuur be
tingbouŋ na kur po.
9 A baka be tiŋ na paak, ki te saak baa,
ki bia te ki li mɔk koorin, ki kpai.
Ki a gbeen bi kpennii nyun, ki te ki tiŋ na naan jeet.
Faa tun biaŋinbae na:
10 a te saak baa yoo kur kpaant ni,
ki nyun borikit tiŋ na;
a te samimmiiuk baa ki maant tiŋ, ki te bonbuburit kur pia.
11 Ki a te jeet naan binn kur ni,
ki tii saan siaminba kur, ki jeet be li kura po.
12 Ki bonkobit kpinkpaar boor gbee nan bonkobit,
ki kunkona na gbee nan parpeenn,
13 ki bonkob-kpaaŋ na gbee nan pei,
ki baat na mun gbee nan jeet;
ki bona kur kpamm ki yiin yanii nan parpeenn.