66
Ki jiin dontir nan niipoturu yaŋ po
1 Tingbouŋ na niib kur n pak Yennu,
ki yikin nan kpinkpammuk,
2 ki yin yaŋ ki baakit u sann,
ki turɔ dontir nan baakir,
3 ki yet Yennu a, “Toona nba ki a tuun na teen bakitnauŋ.
A paŋ yab bonchiann,
ki li te ki a datai gbaa a tɔɔnn nan jaŋmaanii.
4 Sɔɔ kur nba be tingbouŋ na ni jiantira.
Bi yiin yanii ki dontira. Bi yiin yanii ki dontir a sann.”
5 Saana man ki tan got linba ki Yennu tun.
U tuun bakitnauŋ toona, nisaarik yaa paak.
6 U te ki mɔkgbeŋir kpant tinkooŋ,
ki ti yeejamm somm tiŋ maŋ ni ki poot.
Ŋanne ki ti ji kpamm waa tun nna maŋ.
7 Yennu-e dia durinya nan u paŋ,
ki u ninbina gorii digbana kura,
Mɔyêtdamm daa fi ki tookitɔ.
8 Digbana niib kur n pak Yennu man;
Ii ŋaan ki niib n gbat i dontir fuur.
9 U te ki ti mɔk manfoor, ki guut, ki ti ki baa.
10 Yennu, fine bikint na;
a bikint nan saauk daanɔ nba tuu pur kut biaŋinba nae.
11 A te ki ti sik baruk ni, ki bia nyakin jik-kpiasir ti poor po,
12 ki te ki ti datai diint,
ki ti somm ki gar muu nan nyunmɔna ni;
mɔtana, a ji baar nant siaminba ki manu bewa.
13 N saa baar nan mujoonu piinii a ŋaak ni.
N saa tura linba ki n senn mɔsonn nan n saa tura na.
14 Maa bo be daamii ni ki sat mɔb
nan n saa tura piinii nba na, see ki n tura.
15 N saa baar nan pei ki lin joo muu a maruŋ binbintir na paak.
N saa baar nan naajai nan buunii ki mann maruŋ,
ki li munyuuk saa do sanpagbouŋ ni.
16 Yimm nba kur tiin Yennu jaŋmaanii na,
baat man ki tan gbiint, ki n saa beti waa tun linba ki turin.
17 N bui fabin sommir po, ki dontirɔ nan yanii.
18 Li-i bonni tee ki n ki fiit n yanbɔmm,
Yennu bo kan gbiint ki turimi.
19 Ŋaan barmɔnii, Yennu gbat ki turima, ki gbiint n miaruwa.
20 Paku tee Yennu yare, kimaan u ki yêt n miaru;
u bia ki yêt wun turin u lommi.