80
Yenmiaru nba jiin Israel teeb fiinu po
1 Yennu, fin nba din ŋmakitir Israel teeb
nan pekpaarik nba tuu ŋmakitir pei biaŋinba na,
gbiintir ki turit.
Fin nba kar a naangbouŋ paak,
bonninnant banlee nba mɔk kpinkpant na* 80.1 Bi maan ni, bi yib “cherubime”, ki bi naan bonkobit, ŋaan mɔk kpinkpant. paapo,
2 fiitir a mɔŋ ki wann Efraim booru nan Benjaminn booru
nan Manase booru, ki jii a paŋ ki baar tinnit.
3 Yennu, ŋaant ki tin jen a boor,
a tinit ninbaauk ki tin la tinnu.
4 Yabint daanɔ Yennu, a saa donn wutoor
ki lin wei nlee, ki tan fit gbat a niib miaru?
5 A te ki ti di ninbaauk,
ki turit ninnyuut nan nyubitgbeŋir ki ti nyuu.
6 A te ki ti datai kɔn nant, a bin fat ti tinii ki sukiit.
7 Yabint Yennu, a tinit ninbaauk
ki ŋaan ki tin jen a boor ki la tinnu.
8 A nyii nan tiik nyakir Ijipt tiŋ nie, ki ber digbanlia,
ki nyinnib, ŋaan bur nyakir maŋ bi tiŋ ni.
9 A din poŋ ŋamm yiare leŋ ki burir, ki te ki li kpaat,
ki li jiina mii sik, ki lat ki gbenn tiŋ na kur po.
10 Tiik na maasu din bakin kunkona nawa,
ki li yiinii bia piin kpek-kpera na.
11 Li yiinii din lat baar Sinsuuk ni mɔkgbeŋir na boora,
ki bia tant ki saa tuu Yufrates mɔkira.
12 Bee ki a yeer joona nba maa ki lintiri?
Mɔtana, wunba kur gaar saa fit jan li lɔɔna.
13 Mɔdoorii biirire, ki muuk ni bonkobit bia di ŋanne.
14 Yabint Yennu, jenin ti boor.
Tibint yendɔuŋ ni, ki got sikin ti paak;
baat ki tan tinn a niib.
15 Baat ki tan tinn tilontik nba ki a burɔ,
ki u tee tipaaŋ, ki a te ki u kpaat nan paŋ na.
16 Ti datai chɔɔr ki bir tiŋ ni, ki joor muuwa;
gotirib nan wutoor ki biirib.
17 Guut ki tinn niib nba ki a gannib,
ki bi tee digbann nba ki a te ki bi paar na.
18 Ki ti ji kan ban lek ti numm nanani.
A te ki tii mɔk manfoor, kii yi a sann kii dontira.
19 Yabint daanɔ Yennu, a tinit ninbaauk,
ki ŋaan ki tin jen a boor, ki la tinnu.