81
Yenjiantu jaamm yaŋ
1 Yinin yaŋ sanpaapowa nan kpinkpammuk
ki tur ti guutɔɔ Yennu.
Yinin dontir yaŋ ki tur ŋɔɔ Yennu nba ki Jakɔb din jiantir na.
2 Piint bonmumɔɔt faanu kii ŋakin siiyak,
ki pinn kunkɔmana nba be kɔnn nan biɔk paak na.
3 Pebin jaamm na naatunn, yoo nba ki ŋmaarik paan,
nan yoo nba ki u tee ŋmaamunn na.
4 Linba nae tee Israel teeb sennu,
ki tee wannu nba nyii Yennu nba ki Jakɔb*81.4 Jakɔb sanleere tee Israel. din jiantir na boor,
5 ki u sennir ki li tee Israel teeb sennu
yoo nba ki u din lek Ijipt tiŋ na.
N din gbat magamm nba ki n ki mi,
6 ki li yet a, “N paat jika nba paa i bɔpiat paak nawa.
N te ki i bir i jika kurawa.
7 I yiinin yoo nba ki i be wahala ni, ki n tinni,
ki n be wonpaaruk ni, ŋaan gat ki turi,
ki bikini Meriba nyun boor.
8 Gbiintir man, n niib, ki n turi kpaanii.
Israel teeb, n bo sunman yin gbiint ki turime.
9 I daa ban jiantir yensau.
10 Mine tee i Yomdaanɔ Yennu,
mine din nyinni Ijipt tiŋ ni;
yaatir i mɔb man, ki n dinni.
11 “Ŋaan n niib na kan gbiint ki turimi.
Israel teeb na kan sikin bi mɔŋ ki turin.
12 Li paak ki n te ki bi be tuukpaatuk benu,
ki tuun bi mɔŋ nba loon bii be biaŋinba.
13 N niib-i bonni saa gbiint ki turin,
Israel teeb maŋ-i bonni saa wei n wannu,
14 n bo saa kɔne yian ki nyann bi datai,
ki biir bi datai maŋ kur.
15 Ki binba ki loonin na, jaŋmaanii saa soorib,
ki bin gbaan n tɔɔnn,
ki bi tubdatu sii be yaayoo nan yaayoo.
16 Ŋaan n saa dinni jeet nba ŋan,
ki bia gbooni nan siat nba saa nyi tanfiiɔk ni.”