86
Yenmiaru nba jiin sommir po
1 Yennu, gbiintir ki turin gatu,
kimaan n tee tatimɔɔe, ki namii.
2 Ii guu n manfoor, kimaan n jii n mɔŋ ki turawa.
Fine tee n Yennu, ki a tinn a daabir nba teena yada na.
3 Yennu, a tinin ninbaauk, kimaan n meia yoo kur.
4 Yennu, a te ki a daabir-ii mɔk parpeenn,
kimaan n jikit n miaru ki teen fine.
5 Yennu, a mɔk nyikinchab, ki ŋan turit,
ki a lomm gbee nan wunba kur miara.
6 Yennu, gbiintir n miaru,
ki gbiint n fabinii nba loon sommir.
7 N wahala yooe ki n saa yiina, kimaan a saa turin gatuwa.
8 Yennu, yensau kaa ki tee nan fin na,
sɔɔ daa ki ban tun siar ki li tee nan a yar na.
9 Yennu, digbana nba kur ki a nan na tan saa baar
ki gbaan a tɔɔnn, ki jianta; bi tan saa tur a sann baakir.
10 A tee yabintdaanɔe, ki tuun bakitnauŋ toona, fin kɔɔe tee Yennu.
11 Yennu, a wannin a sɔnii, ki n saa somm nan barmɔnii.
A wannin ki n jianta nan n par kur, kii tiin a sann jaŋmaanii.
12 N Yomdaanɔ Yennu, n saa jianta nan n par kure.
N sii baakit a sann nan yoo nba kaa gbennu.
13 A mɔk lomm bonchiann nanin, ki tinnin,
ki n ki sik kaauk ni.
14 Yennu, karinbaandamm fiir a bin biirin,
ki tee nikpiirit nba taan leeb a bin kpin;
bi tee niib nba baka kaa a poe.
15 Ŋaan fin n Yomdaanɔ, fine tee ninbatinu nan lomm Yennu,
ki mɔk sukuru nan barmɔnii nan burchint.
16 Jiantir n paak, ki tinin ninbaauk, a chekinin, ki tinin,
kimaan n jiantira nan n naa nba din jiantira biaŋinba nae.
17 Yennu, turimin a ŋamm siara, ki n datai n la, ki di fei,
kimaan fin Yennu-e sommin ki maan n par.