88
Yenmiaru nba jiin sommir po
1 N Yomdaanɔ Yennu, fine tee n tinntɔɔ,
n mɔ fabin ki teena yonnu nan nyiɔk kur.
2 Gbatir n miaru, gbiintir n fabinii ki sommin.
3 Parbiir bonchiann baarima, ki n ji naak nan kuun.
4 N ji tee nan nileeb nba tuu yaa bin kpo nae,
ki n paŋ kur gbenn.
5 Ki n nyint kpeemm boor,
ki ji tee nan binba ki bi tuu kpib ki bi dɔɔ kaat ni,
ki tee binba ki a ji ki tian bi po na,
binba ki a ji kan sommibi.
6 Ki a jiin ki lun kasunsuŋ ni,
ki li tee siaminba tee bunbɔncheenn ki bia sumii chib.
7 A wutoor paa n paak ki kpai, ki n dɔɔ nyunpana lɔŋ ni.
8 A te ki n yɔnanmɔnii nyikin, ki te ki n nubir bi boor,
ki n be diloor, ki ji kan fit chiar.
9 N ninbina diŋ nan wahalawa.
Yennu, n yia daa kur, ki dont n nii ki meia.
10 A tuun bakitnauŋ toona ki teen kpeemmi-i?
Kpeemm fit fi ki dontirani-i?
11 A lomm nba kaa gbennu na, bi piak li po kaat ni-i?
koo ki piak a binbenŋaŋ, biiru boori-i?
12 Bi laat a yaarlituk toona bunbɔnn niŋi-i?
koo ki laat a toonŋana tiŋ nba ni ki bi tamm a po na ni-i?
13 Yennu, n yi fine, maa a sommin; n meia sanyiɔk kur.
14 Yennu, bee ki a yêtimi? Bee ki a lek a numm nanimi?
15 Maa fiir ki tee bika, n di wahala ki per man kpowa;
a tubdatu jikir na chɔkima,
16 ki a wutobiiuk na butima,
ki a jaŋmaansooruk leku na biirin.
17 Daar n tuu daar, li tuu lintime nan nyunmɔnn na,
ki set loonin lokir kur po.
18 A te ki n yɔnanmɔnii nyikin,
ki bunbɔncheenn kɔɔe ji tee n yɔnanmɔŋ.