89
Israel teeb daamii yoo yaŋ
1 Yennu, n sii tun yiin yaniie
ki jiin a lomm nba kaa gbennu na po.
N saa jii mɔbe ki mɔɔnt a barmɔnii binbeŋ po,
maaru n tuu maaru kur ni.
2 N saa wann nan a lomm see-e kenken yoo kur,
ki bia wann nan a barmɔnii binbeŋ be-e fanu
nan sanpagbouŋ na.
3 A din yet a, “N senn n mɔlor nan nirɔ nba ki n ganne.
N senn mɔsonn nan n toontunnɔ Defid-e a,
4 ‘A maaru ni nirɔe sii tun tee kpanbar.
N saa te ki a naangbouŋ-ii mɔk paŋ, maaru n tuu maaru kur ni.’ ”
5 Yennu, sanpagbant yiin yanii ki dont a bakitnauŋ toona,
ki kasii damm yiin a barmɔnii binbeŋ po.
6 Yennu, sɔɔ ki be yendɔuŋ ni ki tee nan fin na;
malakanba nba be yendɔuŋ ni, bi sɔɔ ki tee a lɔɔ.
7 Kasii damm sinsuuk nie ki yentinu be bonchiann,
a mɔk baakir ki gar binba linta na kur.
8 N Yomdaanɔ Yennu, sɔɔ ki be ki tee nan fin na.
Yennu, fine tee yabint daanɔ, ki mɔk barmɔnii binbeŋ bona kur ni.
9 Ki a ŋmakitir mɔkgbeŋa,
ki yoo nba ki li nyunpana fiiri, ki a tuu te lin diŋ.
10 A din faa but bonsusoouk Rahab ki kpiiu;
ki jii a panchiɔŋ ki nyann a datai.
11 Sanpaak nan tingbouŋ na kur tee a yare.
Fine nan durinya nan linba kur be li ni.
12 Fine nan li niidiitu nan niigaŋ po kur.
Tabor kunkonn nan Hermonn kunkonn kur yiin parpeenn yanii
ki dontir fine.
13 A kpinkpouŋ be nan yiikooe, ki a nuu mɔk paŋ,
ki a diitu nuu be sanpaapo.
14 Kasii nan barmɔnii binbeŋe tee a naangbouŋ fiakir,
ki lomm nan barmɔnii binbeŋ be a tɔɔnn po.
15 Yennu, niib nba tumii ki sii jiantira nan yanii,
parpeenn tee bi yare; ŋamme tee binba somm a yentu ni na.
16 Bi kpamm a sann nie daa kur, ki dontira, a toonŋana paak,
17 ki ti baakir nan paŋ nyi a boor, ki a lomm niŋe te ki ti nyann.
18 Yennu-e gann ti guutɔɔ,
fin nba tee timm Israel teeb kasii Yennu na,
fine turit ti kpanbar.
Yennu mɔlor nan Defid
19 Sianyoo ki a din pak yirintu ni ki tur a barmɔnii toontunnɔ,
ki yet a, “N somm kunkɔnkɔnnɔ nan paŋa,
n jii naangbouŋ ki tur daanɔ nba ki n gannɔ niib na niŋa.
20 Mine jii n toontunnɔ Defid
ki mɔɔn kasii kpan u yur paak ki teenɔ kpanbar.
21 N paŋ sii yɔɔ be nanɔ; barmɔnii, n yiikoo saa te ki u wakii.
22 U datai kan ban nyannɔ; nitonsɔɔ kan ban nyannɔ.
23 N saa faa but u datai, ki bia kpi wunba kur namɔ.
24 N sii loonɔ ki be fanu nanɔ, ki te ki u laat nyannu yoo kur.
25 N saa yarik u naangbouŋ,
laa nyii Sinsuuk ni Mɔkgbeŋir ki saan tuu Yufrates mɔkir.
26 Ki u saa betin a, ‘Fine tee n baa nan n Yennu,
ki bia tee n guutɔɔ nan tinntɔɔ.’
27 Ki n saa jiiu ki teenɔ n bijakper,
ki u sii tee wunba gar kpanbar kur;
28 ki n sii tun dia n mɔsonn nanɔ,
ki n mɔlor sii yɔɔ be nanɔ nan yoo nba kaa gbennu.
29 N saa ŋamm senn u naan ki lii be mɔkmɔk nan mɔkmɔk,
ki u yaaboonne sii tun tee kpanbar.
30 “Ŋaan li-i tee ki u yaaboona na ki mɔk mɔsaku nan n sennu,
ki bia ki waa n wannu na,
31 li-i tee ki bi ki saak n kpaanii, ki bia ki dia n sennu na,
32 ŋann n saa dat bi tubae, kimaan bi yanbɔmm paak.
N saa te ki bin di fara bi biit paak,
33 ŋaan n kan nyik n lomm nan Defid-i,
koo ki kan dia n mɔlor nanɔ.
34 N kan biir n mɔlor nanɔ,
koo ki nyinn mɔlor nba ki n lor nanɔ na ni siari.
35 “N por nan n kasii sann nae ki kat,
nan n kan ban faar faak ki tur Defid-i.
36 U sii tun mɔk yaaboonae,
ki mine sii gorii u naangbouŋ nan yoo nba kaa gbennu,
37 ki li sii yɔɔ be nan ŋmaarik nba yɔɔ be sanpagbouŋ ni
biaŋinba na.”
Fabinii ki jiin baa nyann kpanbar na po
38 Mɔtana, a donn wutoor nan a kpanbar ganntɔɔ nawa,
ki yêtɔ, ki ji tabitɔ taar.
39 A biir mɔlor nba ki a lor nan a toontunnɔ nawa,
ki lu u naan fokirik jakint ni,
40 ki yeer u doo joona, ki biir u ŋapaara ki li teen yann.
41 Ki binba kur gar leŋ jaan u bona, ki u leeb ji laau.
42 Ki a te ki u datai nyannɔ, ki te bi kur mɔk parpeenn.
43 A te ki u kunkɔntiat teen yann, ki te ki bi nyannɔ tɔb ni.
44 A tiit u naan dammira, ki faa yeer u naan kok ki bir tiŋ ni,
45 ki te ki u kpet yian, ŋaan ki u yoo daa ki baari,
ki te ki u dii fei.
Yenmiaru nba jiin fatu po
46 Yennu, a saa bɔr a mɔŋe ki saa tuu yoo nba kaa gbennu-u?
A wutoor saa di nan muu na ki lin wei nlee?
47 A tiar n manfoor nba jiŋ biaŋinba.
A tiar nan fine nant, ki ti tee nisaarii.
48 Ŋmee sii yɔɔ be u manfoor ni, ki kan ban kpo?
Nisaarik saa teen nlee, ki kan sik kaauk ni?
49 N Yomdaanɔ, a lomm nba din be na, li siara be lia?
Mɔsonn nba ki a din lor nan Defid na be lia?
50 A daa tammit baa sukii min, a toontunnɔ biaŋinba,
nan maa bia gaar tingbouŋ na mɔtont kur biaŋinba.
51 Yennu, a dataie sukii a kpanbar ganntɔɔ na.
Siaminba kur ki u saa, ki bi waa sukiiɔ.
52 Pakin Yennu man ki saa tuu yoo nba kaa gbennu.
Lii tee nna.