91
Yennu-e tee ti guutɔɔ
1 Wunba baar Yennu boor ki loon fatu;
wunba biar Yabint Yennu maasu,
2 ŋɔɔe saa fit yet a, “Yennu, fine tee n guutɔɔ nan n fat-tɔɔ.
Fine te n Yennu; ki n teena yada.”
3 U saa nyinna woonin ni ninbɔŋ nan yiarkanbant kur ni.
4 U saa jii u kpinkpante ki bakina, ki sii guua ki a be fanu,
ki u barmɔnii saa guura ki bia kɔn tura.
5 A daa tiin nyiɔk ninbɔŋi, koo binba saa pikina yonnu ni,
6 koo yiarkanbant nba baat nyiɔk, koo yiarbiit nba kpi yonnu ni.
7 Tusir saa kpo ki dɔɔ linta,
ki tusaa piik n kpo ki linta, ŋaan a kan la daŋi.
8 A ninbinn saa la biit damm nba laat tubdatu biaŋinba.
9 A jii Yennu-e ki teenɔ wunba kɔn a paak,
ŋɔɔe tee Yabint daanɔ, ki tee a guutɔɔ;
10 li paak, ninmɔnn kan baara,
ninmɔnn kan nakin a ŋaaki.
11 Yennu saa jii u malakanba ki bin guua,
kii goriia siaminba kur ki a saa.
12 Bi sii dia-a nan bi niie, ki a taar kan gbiat tann gbaa.
13 A saa ŋmaat yanbɔra nan wai, yanbɔrtont nan waalabirii.
14 Yennu yet a, “N saa tinn binba mɔk lomm nanin na,
ki guur binba min ki n tee bi Yennu na.
15 Bi-i yiinin, n saa turib gatu; bi-i kɔɔ daamii ni,
n sii be namm, ki nyinnib, ki te bin la baakir.
16 N saa turib manfofoouk, ki tinnib.”