92
Dontir yaŋ
1 Yennu, li ŋan ki tin tura niipoouk bonchiann.
Yabint Yennu, li ŋan ki tin yin yaŋ ki tura baakir,
2 ki mɔɔnt a lomm nba kaa gbennu na, sanyiɔk kur;
nan a mamɔmm na, nyiɔk kur,
3 ki jii bonmumɔɔt nan naagbai ki yin yanii ki donta.
4 Yennu, a paŋ toona teenin parpeenne;
faa tun linba nae te ki n yiin kpinkpammuk yanii.
5 Yennu, a toona tee toonjaanae.
A dudukit sumii bonchiann.
6 Jatuk kan fit bann linba na,
yankaarin daanɔ kan fit bann linba na paaki.
7 Biit damm lek sii kpaatir nan mɔɔt nae;
binba tuun toonbiit na lek sii mɔkitire,
ŋaan fin Yennu tan saa biiribe fas,
8 kimaan fin Yennu-e tee yiikoo daanɔ yaayoo siiyoo.
9 Ti mi nan a datai kur saa kpowa,
ki a saa nyann biit damm na kura.
10 A te ki n mɔk paŋ nan mɔnaab nae,
a tee parpeenn piisime n paak.
11 N la ki a nyann n dataiwa,
n gbat biit damm mɔniiwa.
12 Niŋamm saa yit nan kaatii nae,
bi sii kpaatir nan Lebanonn kpekii nae.
13 Bi tee nan tiinii nba ki bi burib Yennu ŋasaakak ni nae,
ki bi kpaatir ki yit Yenjiantu ŋasaakak ni,
14 ki tuu kpeta, ŋaan bia loon lɔɔna,
ki bi faat mei yoo kur, ki bi mɔk paŋ.
15 Ŋanne want nan Yennu ŋan,
n guutɔɔ maŋ ki mɔk siara biit u ni.