94
Yennu-e tee sɔɔ kur barbuurɔ
1 N Yomdaanɔ, fine tee Yennu nba daar niib tuba,
fiitir a wutoor ki wann.
2 Fine tee nisaarii kur barbuurɔ,
fiit ki tur biit damm na, baa jaŋ nan linba.
3 Biit damm na parmaasir saa wei nlee?
Yennu, li saa wei nlee?
4 Biit damm na parbifaanu saa wei nlee?
ki bi faa parbia ki jiint bi toonbiit po.
5 Yennu, bi dint a niib biake;
bi mukis binba tee a yab nae.
6 Bi kpi pakɔi nan kpeebiie,
ki kpi saamm nba kɔɔ ti tiŋ ni na.
7 Bi yeen a, “Yennu ki laatit;
Israel teeb Yennu maŋ ki mi linba ki ti tuun na.”
8 N niib na, bee ki i mantik tee bonliinii nna?
I tan saa subir nlee yooe?
9 Yennu-e nan ti tuba, u ki gbia-a?
Ŋɔɔe nan ti ninbina, u ki laati-i?
10 Digbana kur be u nuu nie, u kan dat bi tuba-a?
Ŋɔɔe tee nisaarik kur wanntɔɔ, u kɔŋit bannu-u?
11 Yennu mi baa dukii linba kur;
u mi bi yankaarin dudukit nba tee.
12 Yennu, parpeenn be daanɔ nba ki a tumiiɔ na paak,
wunba ki a wantɔ a sennu na.
13 A tuu turɔ foome ki nyinnɔ biak ni,
halii nan daar nba ki bi saa gbiir bootuk
ki biit damm n baa li ni na.
14 Yennu kan nyik u niibi;
u kan nyik damm nba tee u yab na.
15 Barmɔnii saa ŋamm kii be buut damm boor,
ki binba tee kasii na kur saa gaarir.
16 Ŋmee set n poor ki took biit damm na?
Ŋmee gaar n paak ki took toonbiit damm na?
17 Li-i bonni kii tee ki Yennu sommin,
n bo saa saan kpeentiŋe yiama.
18 Ki n yet a, “N yaa man baae na,”
ŋaan ki fin Yennu lonchiɔŋ na fiinin ki sennin.
19 Yoo nba ki n gbee nan dudukit ki li daamiin,
a tuu chee n pare, ki turin parmaasir.
20 A ki loon barbuura nba di fobit piinii na maami,
binba tuun linba ki sennu yaa bi daa tuun,
21 binba lorin lorbiit niŋamm paak,
ki te ki bi kpi binba kaa biit na.
22 Ŋaan Yennu-e kɔn n paak, ŋɔɔe guun.
23 U saa dat bi tuba bi biit paak,
ki biirib bi yanbɔmm paak.
Ti Yomdaanɔ Yennu saa biiriba.