95
Dontir yaŋ
1 Baat man ki tin yin dont Yennu.
Ŋaant tin yin parmaasir yaŋ ki tur Yennu, ŋɔɔe guut.
2 Ŋaant ti baar u boor nan niipoturu,
ki yin kpinkpammuk nan dontir yanii,
3 kimaan ti Yomdaanɔ tee Yabint Yennu-e,
yabint kpanbar nba gar yenbis kur.
4 Ŋɔɔe dia tingbouŋ na kur ki ŋmakitir,
laa nyii tinpɔɔr ni ki saa tuu jɔfɔkit yura paak.
5 Mɔkgbeŋa nan tingbouŋ na tee u yare,
ki u diar, kimaan ŋɔɔe nann.
6 Baat man ki tin gbaan ki jiantɔ;
ŋaant ki ti gbaan Yennu nba turit manfoor na tɔɔnn,
7 kimaan ŋɔɔe tee ti Yennu, ki ti tee niib nba ki u goriit,
niib nba ki u teent linba ki ti loon.
Dinna nba na, ii gbiint waa piak linba a:
8 “I daa nyar i tuba nan i yeejamm nba din nyar bi tuba,
Meriba nyuntonn boor,
daar nba ki bi din be Masa* 95.8 Masa tee Meriba nyuntonn maŋ sanleere. nyuntonn boor, kunkoouk paak na.
9 Leŋe ki bi din bikin min Yennu,
ŋaan bi lek din la maa tun linba ki turiba.
10 N wutoor din doo bi paak bina piinna,
ki n yet a, ‘Niib na mantik teen tubkangbata damma,
bi yêt bin sak n sennue.’
11 N wutoor din dooe, ki n por mɔporjaann a,
‘I kan ban kɔɔ tiŋ nba ki n bo yaa man turi foon na ni.’ ”