96
Yennu-e tee kpanbarjaann
(1 Barkperii 16.23-33)
1 Yinin yanpaanii ki tur Yennu.
Durinya munn n yin ki tur Yennu.
2 Yinin ki tur Yennu ki dontɔ.
Daar kur, ii mɔɔntir waa tinnit na barŋaniie.
3 Ii mɔɔntir u baakir kii teen digbana kur,
kii mɔntir u yabint toona kii teen nisaarii kur.
4 Yennu tee Yenjaanne ki ŋan nan tii dontirɔ bonchiann,
ki turɔ baakir, ki lin gar kpanbar kur.
5 Digbanlia yenbis na kur tee yanne,
ŋaan Yabint Yennu-e nan sanpaak.
6 Dontir nan yabinte lintɔ,
paŋ nan fante gbee u jiantu ŋasaakak na ni.
7 Tingbouŋ na niib kur n dont Yennu,
bin dont u baakir nan u yabint na.
8 Ii dont Yennu sann nba tee baakir sann na,
ki baar nan piinii u jiantu ŋasaakak ni.
9 Yoo nba ki kasii daanɔ Yennu dɔkit,
yin baa gbaan u tɔɔnn;
tingbouŋ na munn n jekir u tɔɔnn.
10 Pakin ki tur digbana kur a, “Yennu-e tee kpanbar.
Tingbouŋ na see-e kenken ki kan ban nyat;
u saa jii mamɔmme ki bu niib buut.”
11 Tiŋ nan sanpaak, ii mɔk parpeenn man.
Mɔkgbeŋir nan linba be li niŋ kura, ii kpamm man.
12 Tinii nan linba be leŋ kura, ii mɔk parpeenn man.
Fɔɔr ni tiinii kur-ii kpamm man,
13 yoo nba ki Yennu saa baar a wun dia tingbouŋ na.
U saa dia durinya na niib nan mamɔmm nan ŋante.