97
Yennu-e tee kpanbarjaann
1 Yennu-e tee kpanbar.
Tingbouŋ, ii mɔk parpeenn.
Yimm tinii nba foo mɔkgbeŋa ni na, ii kpamm man.
2 Sanpagbant nan bunbɔnne lintɔ;
u dia niib nan binbenŋaŋe nan mamɔmm.
3 Muu gaar u tɔɔnne ki di u datai nba ŋaa lintɔ na.
4 U sanyikintii tuu yent durinya nae,
ki tingbouŋ na n la ki jekir.
5 Jɔfɔkit tuu nanne nan kpan na,
Yennu nba tee tingbouŋ na kur Yomdaanɔ na tɔɔnn.
6 Sanpaak mɔɔntir Yennu ŋante,
ki nisaarii kur laat waa mɔk yiikoo biaŋinba.
7 Patmanntɔɔ kur tuu di feie;
yenbis kur n gbaan ki jiant Yennu.
8 Yennu, Sayɔnn niib mɔk parpeenne,
ki Juda teeb kpamm, kimaan a buut paak.
9 Yabint Yennu, fine tee tingbouŋ na kur diatɔɔ;
a tee Yenjaanne ki gar yenbis kur.
10 Yennu loon niib nba ki tuun biit nae;
ŋɔɔe guu u niib manfoor;
ŋɔɔe nyintib biit damm paŋ ni.
11 Yentu tuu yent kasii damm paake;
ki parmaasir baat niŋamm paak.
12 Yimm niŋamm kur-ii mɔk parpeenn man,
kimaan linba Yennu tun na paak.
Tiat linba ki kasii daanɔ Yennu tun na, ki turɔ niipoouk.