98
Yennu-e dia durinya na kur
1 Yinin yanpaanii ki tur Yennu,
kimaan u tun bakitnauŋ toonawa.
U jii u tiɔŋ yiikoo nan kasii paŋe ki nyann nyannu na.
2 Yennu-e mɔɔnt waa nyann biaŋinba,
ŋɔɔe fiit u tinnu yiikoo na ki wann niib.
3 U dia u mɔsonn nba ki u din senn ki tur Israel teeb na,
nan u mamɔmm nan u lonchiɔŋ nba ki u turib.
Nisaarii nba be siar kur po la Yennu nyannu nawa.
4 Tingbouŋ na kur n yin nan parpeenn ki tur Yennu;
jiin yanii nan kpinkpammuk hootii ki dontɔ.
5 Yinin dontir yanii ki tur Yennu.
Faan kɔnn ki yin yaŋ ki turɔ.
6 Pebin naatuna nan yina,
ki hoot nan kpinkpammuk ki tur Yennu;
ŋɔɔe tee ti kpanbar.
7 Mɔkgbeŋir nan linba be leŋ kur, ii fu man;
tingbouŋ nan linba be leŋ kur, ii yiin man.
8 Mɔka, ii poi niipoot man;
yimm kunkona, ii taan kii yiin parmaasir yanii, Yennu tɔɔnn;
9 kimaan u baate a wun bu niib buut.
U saa dia durinya na nan mamɔmm nan ŋante.